潮州粉果

朋友今日嚟探我, 順便幫我攞用信用卡積分,換番嚟有蓋煎pan,真係好感激佢,一場嚟到,於是晏晝就一齊包咗呢個潮州粉果,有得玩有得食,真係開心.

就係呢個不锈鋼有蓋煎pan, 我係一田見過公價要賣成1,XXX, 而家朋友用佢積分換俾我,真係好感激佢.

呢個粉果食落都唔錯,祗係計錯水份,要後加生粉,木薯粉,結果蒸好後,粉果皮比較煙UN咗.

2人撐枱腳-海鮮餐

因為奄尖大少攞咗幾日大假抖吓,加上我又收到啲不勞而獲嘅錢,所以決定好好地大刷一餐,出去食淨係一碟叉燒飯都成$3X,而家出面食真係貴到離譜,所以就由我呢個買手負責買海鮮,而奄尖大少就負責做大廚.

原材料包括有老虎蝦,南非飽魚.

仲有本地龍蝦

經過奄尖大少一輪烹調工夫後,就成為以下呢幾碟, 蒜蓉蒸龍蝦,陳皮蒸飽魚,豉油王煎蝦碌,煎倉魚,仲有未蒸嘅班腩,留番今晚食,因為一次唔食得咁多野,所以採取分段食法.

另外仲買咗現成嘅潮州滷水鵝腎,豬脷,豆腐,我諗一餐一定食唔晒,可能要食多兩餐先可以清貨.

叮叮蝦米腸

今朝天氣好差,打完皂後都唔知想整乜做晏晝好,突然想食蝦米腸,但又唔想蒸拉布腸咁複雜,於是就試吓用微波爐叮叮蝦米腸, 但微波爐膠盒底最好墊張微波爐保鮮紙再掃油,會容易攞起同埋捲,否則要落好多油係盒底,唔係咁健康.

落晒蔥粒,蝦米,所以有一條係齋腸.

加埋甜豉油,芝麻,甜醬就食得嚕...,叮叮腸粉質感同街賣腸粉差不多,但無拉布腸咁薄,柔滑.

再戰格仔餅

明日借部機俾朋友試用,所以今日就再整定啲格仔餅,今次唔係自己開麵糊,而係用現成pancake粉,加淡忌廉,雞蛋攪勻再過篩而成,食落好似鬆軟啲,不過盒上所寫成份唔係100%天然架,所以下次都係自己開麵糊嚕...

杏仁餅唔易整

睇見網友整嘅杏仁餅,做法都好簡單,於是實行跟風人整我又整,今次係參考咗"玲感蛋糕"嘅"迷你杏仁餅"做法,雖然杏仁餅唔難整,但入模功夫真係唔容易,壓得實出爐後會好硬,壓得鬆就會散,好似右下角個塊餅就係最好例子,而且食落無街買番嚟咁香,我懷疑佢哋落咗杏仁油香精,味道先會咁濃杏仁香味,其實我已經扣起1/3綠豆粉,用杏仁粉代替,仲加埋杏仁碎粒,都係唔覺好香杏仁味喎.

簡單一人午餐-臘腸蝦米冬菇菜飯

昨日開始腸胃炎,個人無乜心機,唔想出街四圍行,抄吓雪櫃有乜剩餘物資,咁就簡簡單單整咗呢個臘腸蝦米冬菇菜飯, 祗係將略為炒過臘腸粒,蝦米粒,冬菇粒,小棠菜放係差不多熟飯面蒸幾分鐘,熄火焗幾分鐘就食得.

芝士香草包 &全麥包

自家種咗啲Rosemary, 但嫌啲香味太勁,好少用嚟煮食,越生越多,唯有趁整麵包用啲,又想用埋啲芝士,於是自行加料,味道都OK, 可惜落橄欖油搽焗盤唔夠多,好難先起到底, 其他麵團就焗埋全麥方包,今次係用低溫中種發酵.

發酵完畢,鋪上芝士塊準備入焗燼嚕..

降低爐溫慢火焗, 趁熱切咗邊個塊嚟食,好香香草味唔太鹹,味道唔錯.

如果全部麵團都整香草包,會食好耐,所以剩低麵團就焗全麥方包.

香蕉蛋糕

每當香蕉成熟時,我總係心思思想攞佢嚟整野食,今次就焗咗香蕉蛋糕,焗好一出爐已經聞到好濃郁香蕉味,聞到都好想食,而且用芥花籽油,又減糖,所以健康啲.

當稍為攤涼啲,就即刻切一塊試食,好鬆軟好香蕉味,不過下次仲可以減少糖.

港式麵包

港式麵包特徵係多油,多糖, 但係正因為咁,所以特別好味,唯有想食嘅時候,間唔中整吓,好似今次就每樣整少少嚟食,包括有雞尾包,墨西哥包(主要剩番喞雞尾包面裝飾餡料,唔好晒),餐包等等, 另外有剩麵團就焗咗提子方包,唔想提子外露焗乾咗,所以捲晒係麵團入面.

薰衣草沐浴液

原本我準備打呢款皂液俾屋企人用,點知有人心急已經買咗一支番嚟用,我本來用開自己打嘅皂皂洗白白,而家就祗好留番自己用, 呢個配方係中性,主要用椰子油,芥花籽油, 橄欖油, 可可脂調配而成,稀釋我就用咗橙花花水, 再加薰衣草精油, 因為唔想加增稠劑咁麻煩,所以就用慕士樽;用試紙試過PH值係8左右,今日就試吓用先.

自製蚊怕水

呢排春天回南又潮濕又熱,一開窗蚊就飛入嚟,咬到我不停抓痕,所以即刻做支蚊怕水嚟噴吓先,蚊怕水主要用香草,包括有香茅, 迷迭香(Rosemary), 百里香(Theme), 馬鞭草, 熱水煲滾,攤凍隔去渣滓.

將香草水+適量酒精,薄荷精油搖勻就噴得,希望可以趕走啲死惡蚊,唔好再咬我.

同格仔餅機開張

今日終於有時間,心情開部新格仔餅機嚟玩,粉漿唔難開,不過最好過篩,令到粉漿幼滑啲,格仔餅機都唔難用,不過雖然兩面都有發熱線,但面個邊好似唔係好上色,但底已經開始金黃色,下次再挑戰吓其他做法.

搽上煉奶,花生醬就成為奶醬格仔餅,好味之餘,都係個句,少食多滋味,自己落咗乜野自己知嘛.

新鮮出爐-波蘿包&熱狗包

原本淨係想整熱狗包用來夾香腸,但心血來潮,突然間想食菠蘿包,於是即刻搓份菠蘿皮蓋上面,出爐後稍為攤凍,即刻食咗半個,果然菠蘿皮夠鬆脆,好味

自己垃垃雜雜嘅午餐

今朝去開街市買餸,諗起屋企買米送嘅粉絲,平時好少用,不如買幾隻新解扇貝起肉,用粉絲墊底蒸做午餐,於是坐言起行就有得食.
蒜蓉,紅蔥蓉用油炒過,所以食落待別香口,好好味,正!

淨係食扇貝,粉絲梗係唔夠飽,於是加熱番兩條焗蕃薯,焗可以濃縮糖份,所以特別香甜架.

另外仲有茶點,係第一次整木糠布甸,雖然個個都話容易整,不過我好似喞得層次唔夠分明喎.

今日下午茶點-檸檬牛油蛋糕

主要想試吓朋友提供嘅牛油蛋糕食譜,剛巧有檸檬,又加埋入去,其實無跟足食譜,減油又減糖,油又兩溝,用咗牛油(6成)+起酥油(4成), 但都好香牛油味喎.
影完呢張相後,搽上RUM酒糖水,再用保鮮紙包實,睇吓明日食有乜分別?

呢兩塊影完相就即刻試食,外皮比較脆,但蛋糕就好軟熟,唔錯.

又買新玩具

幾年前已經見到有格仔餅機賣,興趣不大,所以無諗住買,但近期發現現在啲機已經可以多用途,唔止淨係整格仔餅,自己張信用卡又可以換,於是就決定用積分+補錢換咗返嚟玩吓.
睇相以為好細部,點知去攞時發現成盒都幾大,而且都幾重.

番到屋企,第一時間打開睇吓先,部機實物比相大啲.

第一塊坑紋板可以打平,放上香腸,餡餅之類煎或焗有坑紋意大利香草包,不過話要金黃色,麵包外層要搽油架.

第二塊係用來整夾餡三文治,但餡料要熟透先好放入去夾喎.

最後呢塊就要嚟整格仔餅,說明書有幾款唔同格仔餅食譜提供,不過份量都好多,我會盡快擇日開工試吓呢3種用途先.

第一次煎蠔仔餅,大成功!!

我鍾意食蠔仔餅,但係出面叫餸都係好細碟,仲有其他人一齊食,當然唔好意思自己猛食喇,於是決定自己試吓煎,我跟足原材料,希望味道正宗啲,好似係街食咁好味.
不過為咗健康起見,我祗係落咗1.5個鴨蛋黃,其餘全部係蛋白.

經過一輪工夫,洗乾淨蠔仔再拖水,落胡椒粉,薑汁酒醃一醃,再混合開好番薯粉漿,蛋漿,芫茜等就可以落鑊煎,不過一定要油多啲,蛋邊先夠香同脆,煎好後偷食一啖,果然好好味,又唔腥,今次真係大成功嚕...

加埋蒜蓉西蘭花,就可以開飯,其實我呢個份量煎完有兩底半,所以今晚可以豪食到飽為止,唔駛要就住食,真係大滿足.

斜紋格仔蛋糕卷

前排買咗本彩繪蛋糕卷書,齋睇唔郁手做,好似唔係咁好,今日就決定開工大吉.
首先要焗個蛋糕體先,最晒工夫時間係呢部份,顏色越多分次焗次數就越多,而且又要調色,喞花或線條,加上我係新丁,好少喞花更加雞手鴨腳,不過最終都完成到,真係自己都鬆一口氣.

呢個蛋糕體係用戚風蛋糕,我再加埋用蒸焗法,所以蛋糕比較棉密同軟身.

攤凍後再捲入內餡,放番入雪櫃雪至硬身.

呢個蛋糕卷除咗外觀,仲好有內涵架,內餡係芒果忌廉,因為我切呢兩片係頭尾,所以個樣肉酸D.

自家煮自己食-紅洋蔥牛柳絲飯

紅洋蔥牛柳絲飯-呢幾日天寒地凍,又微風細雨,無特別事都係留係屋企自家煮自己食好過.

甘草酵母金縷梅精華液

精華液差不多用完,今次就整咗呢支甘草酵母金縷梅精華液, 用金縷梅花水,添加甘草,酵母萃取液,甘油,另外再加入佛手柑,燈花精油.