黍米魚片芝士拉麵

今日簡單午餐-黍米魚片芝士拉麵,芝士拉麵係朋友請我試食,麵質爽滑,味道唔錯,可惜比較辣,好彩我祗係落咗半包味粉咋.

小木屋拼布手機袋

過完夏天終於有番啲興趣開工,加上朋友10月中生日,呢批日本先染布買咗好耐,睇咗好多本拼布書,最後揀咗呢個比較簡單款嚟做,拼布真係要逐針縫,加上壓線,整一個已經好頭暈,細研究會發覺我的手工真係麻麻地咋.

原本無加手繩, 但恐怕朋友用時要成日揸住好麻煩,所以再加多一條手帶.

芝麻芋蓉包

今日焗開麵包,就將上次蒸中式包芋蓉餡用埋佢,捲入麵團中再直切開兩條扭麻花咁,互相搭起再放入麵包模內就OK喇. 我懷疑今次朋友讓俾我呢隻唔係高筋粉,我搵日去買多一包高筋粉溝一溝佢,因為焗完攤凍時好軟身,直情企唔隱,應該唔會係咁架?

DIY 秋冬季護膚品系列

轉季喇,自不然都要轉用啲比較滋潤護膚品,一口氣DIY一系列護膚品,包括左上角白色可可脂椰子油handcream, 右上角珊瑚草納豆藍勝肽保濕精華液,橙黃色係胡蘿蔔素防晒日霜,咖啡色係花粉卵燐脂滋潤晚霜.

自製生果酵素 Fruit Enzymes

近排流行DIY生果酵素, 聽講話可以排毒,減肥等等作用,於是我又跟風,分別浸咗兩樽, 青/紅提子+檸檬, 提子+蘋果.

第一日入樽時,原本塞到滿滿.

但經過14日後,就變成咁喇,生果浮晒係面,而下面汁液就係酵素.

為咗儲存方便,過濾汁液後就合二為一樽

加冰,加水沖淡飲,味道好似果汁特飲,酸酸甜甜又帶止少酒味,可以接受.

自家焗叉燒

家庭主婦煩惱,係街市行嚟行去都唔知買乜餸菜好? 唯有再嚟焗叉燒喇,自家整起碼
無落人造色素,味精,而且無咁肥,食得健康啲.

全麥方包-麵包機

本來焗麵包對我嚟講唔係一件難事,但係呢排唔知發生乜事,整乜野都失敗,無論焗包,蛋糕,蒸包全部都失敗,尤其用麵包機焗麵包更甚,今日改用半自動方式,減少搓麵團時間,終於成功番一次喇,可能呢隻高筋粉筋性唔夠強,如果用麵包機搓麵團時間太長,將麵筋攪斷而引至焗麵包時下陷.

杏仁檸檬小蛋糕

祗係想將屋企啲剩餘物資用埋,祗要郁吓手,又有得食嚕...

蒸包又煎餅

之前買咗一包中筋粉,本來準備想整法包,但又拖吓無乜心機整,為咗唔好過期浪費咗,決定蒸中式韮菜肉包,順便試吓煎埋厚切蔥油餅.

包好後正在發酵中,今次洋為中用,用了低溫中種發酵法

今次發酵得唔錯,蒸好後連蒸籠都迫爆,而且包皮夠白.

趁熱立刻切開食一個先,真是餡多皮薄, 正!

與此同時,將另一份麵團打好, 加入酵母,再捲入香蔥粒,麻油,少許鹽捲好.

再用酥棍輾開,灑上芝麻作最後發酵.

但火太猛結果外層煎得較燶,幸好內裡仍然好軟熟,就當係我今天午餐了.

今日簡單下午茶點-中式蒸雞蛋糕

今日下午朋友突然想來拜訪,家裡搜括一下,決定蒸雞蛋糕,作為簡單下午茶點.

日式咖哩雞

天氣咁熱,真係無乜心機煮野食? 見到有食剩雞柳,又有日式咖哩磚,於是加埋薯仔,紅蘿蔔
煮淋後,再加入咖哩磚,簡簡單單又食一餐嚕....
自己煮多菜少肉夠晒健康.

海鮮魚漿兩味

今日見魚檔有鮫魚賣,於是買咗半條,加埋鮮蝦,魷魚攪爛打成魚漿,不過原來鮫魚真係好膠,差啲打到攪拌機都消埋,亦因為太黏,好難用手撻至有彈性,淥完魚丸後,發覺唔夠彈口,又搬埋部攪麵團機,用打蛋白隻漿再狂打,所以碟煎海鮮魚餅就比較彈牙,加埋九層塔,檸檬葉,好香口,雖然價錢唔平,不過真係好鮮味,基本上唔駛落味精,雞粉.

黑糖麻糬

前兩日買咗一盒台灣製黑糖麻糬, $7.5內裡得6塊, 平均35g一塊, 轉眼之間,已經俾奄尖大少食咗4塊,見其實又唔係咁難整,今日就等我嚟試整先.

製作中,將蒸熟麻糬用抹油保鮮袋搓至煙韌,切塊狀滾上烘焙過黃豆粉,再放入膠隔中.

初次試整,祗係整咗6塊,唔敢做太多.

自己當然要試食喇,唔,,下次可以再減糖,再搓多一陣或加多啲木薯粉會煙韌啲.

夏日涼拌DIY鹽鹵豆腐

經過多次做豆腐,終於知道一啲問題所在,今次雖然豆腐質感仍然唔夠幼滑,但勝在豆味濃.

當蜜桃成熟時....

呢排見到生果檔有好多水蜜桃賣,而自製果醬又剛剛食完,於是就整咗一樽蜜桃果醬.

雖然已經擺咗一日係米缸,但桃仍然好生吓.

將桃去皮切粒,用黃砂糖醃咗兩個鐘,等桃出咗啲水份

無加水用煲開細火,加檸檬汁煮至杰身,再加麥芽糖,硬生果膠就完成,不過天氣熱,煮完成身濕晒,真係汗水之作呀.

是日甜品-香蕉雲尼拉雪糕夾餅

為咗要食呢個甜品,晏晝個餐專登食少啲,除咗可以快啲肚餓外,仲要平衡番食量,控制自己唔好食太heavy,今次加埋香蕉一齊食,好味啲.

夏日甜品最佳拍檔

天氣咁鬼熱,唔食啲凍野好似降唔到體內溫度,見到有現成買雲尼拉雪糕,於是整個窩夫夾住嚟食,今次唔跟隨機用泡打粉個食譜,改用係網上搵到呢個淨係落酵母,再用分蛋法食譜, 即係將麵糊加入打至企身蛋白內,發酵一個鐘或以上,出嚟效果唔錯,無咁硬身,比較柔軟,咁配搭食法都幾好.

清甜自製白糖糕

因為我鍾意食白糖糕,但之前整咗幾次都唔成功,攪到都無晒心機再試,但近日睇見Blog友整得好成功喎,於是心思思想再試,今日趁天氣熱,最適合發酵,今朝蒸嘅白糖糕,估唔到真係得咗,再無酸味,幾好食,不過仍然可以再減糖. 多謝網友翠兒分享食譜.

我發多半個鐘,即係1.5個鐘時間.

用塗油大碟蒸,不過下次可以鋪牛油紙先,因為雖然塗油都仲係好黏吓.

睇吓發得唔錯,不過唔知再發耐啲係咪好啲呢?

又嚟食豆腐

繼上次整石膏豆腐唔理想,今次試吓用另外一種方法,就係日本人慣用鹽滷豆腐,但唔知點解由豆漿凝固開始,祗係棉花絮狀,不能成一團或一塊,等咗成20幾分鐘,都要開始壓番水份出嚟,結果豆味就好濃,不過豆腐本身就粗孩啲,唯有再諗諗點去改良.

終於有收成喇-自家發芽菜

好耐之前曾經試過用土法發芽菜,但發出嘅芽菜唔得,又短身又粗根,好難食,近排見到朋友係淘寶買咗部發芽菜機,發出嚟嘅芽菜唔錯,於是再接再厲,又買番一部,部機雖然有自動灑水,但恐怕溫度過高,所以每日換水兩次,前後3日,終於今日有收成喇..
第一天將隔晚浸透綠豆放在養殖盤內,蓋上蓋子.

第2天已經開始長出新芽

第3天已經迅速成長,可惜因為光線問題,影響芽菜頭變成淡紅色,下次可能要再遮光.

係第3日發時已經有咁長喇..

第4天早上終於可以有收成喇,雖然無街賣咁肥壯,但勝在100%天然無添加任何人為野,所以食得安心,放心.