今日下午茶點-日式芝士蛋糕

天氣無咁熱,開始有番啲心情整野食,見咁耐都無整過蛋糕,一於焗番個自己鍾意食日式芝士蛋糕,可惜唔記得中途降低一格,同埋爐溫,結果就....糕面變成火山爆發囉.

幸好唔影響到蛋糕組織&味道,仍然好好食.

法包

基本上係屋企用家庭式焗爐,無蒸汽,又無石板,好難做得好標準法包,我都唔例外,祗係盡力而為, 今次用咗日本名廚西川功晃食譜,不過無用酵頭,而改用打好麵團後,以17小時低溫發酵,翌日早上再從雪櫃攞出嚟室溫回暖約個半鐘,切割後再靜置30分鐘做型,最後發酵40分鐘,然後切割痕,而焗包方法就參考另外一個方法,噴水3-4次後,加入一盤熱水,隨即熄火5-7分鐘,令介紋爆得好啲,再開爐焗多7分鐘.

因為無雙"S"模具,主要係焗爐太細,唔啱用,結果底部唔夠脆,要再番焗包底.

切開睇吓麵包組織都算合格,而勉強叫做皮脆肉軟,但離標準就差好遠,無法解決,除非再買石板同雙"S"模可能會好些喇.

自製越南札肉

我由細到大都好鍾意食越南札肉,可惜係香港好難食到正宗札肉,見網上有食譜教人整,梗係要試吓整喇.
打好一盤肉漿,豬肉+雞脾肉各半,不過打到部高速攪拌機差啲消埋.

雪凍後用烘焙紙捲起

再將捲起肉漿塞入空鐵罐&汽水罐中攞去蒸熟

拆開鐵罐,汽水罐倒出札肉卷攤凍

切開一小塊試味,發覺黑椒太辣,肉質因為家庭攪拌機,始終不及買番嚟札肉軟滑,又唔彈口,原食譜無話要撻,下次自己一定要加多呢個程序再改良吓至得.

酥炸鳳尾魚

講明今日大廚唔係我,而係奄尖大少,佢去街市買生果之餘,順便買咗一兜鳳尾魚番嚟,自己一手一腳,由劏魚,整炸漿,炸魚都係佢自己一條友攪掂,我無幫拖架.

唔想太咸,祗係落咗胡椒粉,少許豉油,略為撈勻就算.

正在炸魚中,慢火少油慢慢炸會脆啲.

其實一邊炸一邊食,兩個人都食咗至少4-5條,再加埋呢一大碟,成本都係$20左右,真係抵到爛.

又嚟生果酵素

繼上次整完提子,蘋果後,又想再試其他生果,今次整嘅係士多啤梨&橙.
第一日入樽

第14日後可以隔渣,泌出汁液

唔知係咪減咗10%糖關係,士多啤梨比較酸,同埋酒味濃.

而橙就OK,祗有些少澀味

自家製檸檬醬(Lemon Curd)

做完生果酵素後,仲有一個檸檬剩低,上網睇吓有乜攪作? 發覺原來可以用嚟整檸檬果醬喎,而且好簡單好易整.

好快就煮好啦....

檸檬果醬用途都好多,可以搽麵包,做檸檬夾心餅餡,捲蛋蛋糕都得,酸酸甜甜好好味架

黍米魚片芝士拉麵

今日簡單午餐-黍米魚片芝士拉麵,芝士拉麵係朋友請我試食,麵質爽滑,味道唔錯,可惜比較辣,好彩我祗係落咗半包味粉咋.

小木屋拼布手機袋

過完夏天終於有番啲興趣開工,加上朋友10月中生日,呢批日本先染布買咗好耐,睇咗好多本拼布書,最後揀咗呢個比較簡單款嚟做,拼布真係要逐針縫,加上壓線,整一個已經好頭暈,細研究會發覺我的手工真係麻麻地咋.

原本無加手繩, 但恐怕朋友用時要成日揸住好麻煩,所以再加多一條手帶.

芝麻芋蓉包

今日焗開麵包,就將上次蒸中式包芋蓉餡用埋佢,捲入麵團中再直切開兩條扭麻花咁,互相搭起再放入麵包模內就OK喇. 我懷疑今次朋友讓俾我呢隻唔係高筋粉,我搵日去買多一包高筋粉溝一溝佢,因為焗完攤凍時好軟身,直情企唔隱,應該唔會係咁架?

DIY 秋冬季護膚品系列

轉季喇,自不然都要轉用啲比較滋潤護膚品,一口氣DIY一系列護膚品,包括左上角白色可可脂椰子油handcream, 右上角珊瑚草納豆藍勝肽保濕精華液,橙黃色係胡蘿蔔素防晒日霜,咖啡色係花粉卵燐脂滋潤晚霜.

自製生果酵素 Fruit Enzymes

近排流行DIY生果酵素, 聽講話可以排毒,減肥等等作用,於是我又跟風,分別浸咗兩樽, 青/紅提子+檸檬, 提子+蘋果.

第一日入樽時,原本塞到滿滿.

但經過14日後,就變成咁喇,生果浮晒係面,而下面汁液就係酵素.

為咗儲存方便,過濾汁液後就合二為一樽

加冰,加水沖淡飲,味道好似果汁特飲,酸酸甜甜又帶止少酒味,可以接受.

自家焗叉燒

家庭主婦煩惱,係街市行嚟行去都唔知買乜餸菜好? 唯有再嚟焗叉燒喇,自家整起碼
無落人造色素,味精,而且無咁肥,食得健康啲.

全麥方包-麵包機

本來焗麵包對我嚟講唔係一件難事,但係呢排唔知發生乜事,整乜野都失敗,無論焗包,蛋糕,蒸包全部都失敗,尤其用麵包機焗麵包更甚,今日改用半自動方式,減少搓麵團時間,終於成功番一次喇,可能呢隻高筋粉筋性唔夠強,如果用麵包機搓麵團時間太長,將麵筋攪斷而引至焗麵包時下陷.

杏仁檸檬小蛋糕

祗係想將屋企啲剩餘物資用埋,祗要郁吓手,又有得食嚕...

蒸包又煎餅

之前買咗一包中筋粉,本來準備想整法包,但又拖吓無乜心機整,為咗唔好過期浪費咗,決定蒸中式韮菜肉包,順便試吓煎埋厚切蔥油餅.

包好後正在發酵中,今次洋為中用,用了低溫中種發酵法

今次發酵得唔錯,蒸好後連蒸籠都迫爆,而且包皮夠白.

趁熱立刻切開食一個先,真是餡多皮薄, 正!

與此同時,將另一份麵團打好, 加入酵母,再捲入香蔥粒,麻油,少許鹽捲好.

再用酥棍輾開,灑上芝麻作最後發酵.

但火太猛結果外層煎得較燶,幸好內裡仍然好軟熟,就當係我今天午餐了.

今日簡單下午茶點-中式蒸雞蛋糕

今日下午朋友突然想來拜訪,家裡搜括一下,決定蒸雞蛋糕,作為簡單下午茶點.

日式咖哩雞

天氣咁熱,真係無乜心機煮野食? 見到有食剩雞柳,又有日式咖哩磚,於是加埋薯仔,紅蘿蔔
煮淋後,再加入咖哩磚,簡簡單單又食一餐嚕....
自己煮多菜少肉夠晒健康.

海鮮魚漿兩味

今日見魚檔有鮫魚賣,於是買咗半條,加埋鮮蝦,魷魚攪爛打成魚漿,不過原來鮫魚真係好膠,差啲打到攪拌機都消埋,亦因為太黏,好難用手撻至有彈性,淥完魚丸後,發覺唔夠彈口,又搬埋部攪麵團機,用打蛋白隻漿再狂打,所以碟煎海鮮魚餅就比較彈牙,加埋九層塔,檸檬葉,好香口,雖然價錢唔平,不過真係好鮮味,基本上唔駛落味精,雞粉.

黑糖麻糬

前兩日買咗一盒台灣製黑糖麻糬, $7.5內裡得6塊, 平均35g一塊, 轉眼之間,已經俾奄尖大少食咗4塊,見其實又唔係咁難整,今日就等我嚟試整先.

製作中,將蒸熟麻糬用抹油保鮮袋搓至煙韌,切塊狀滾上烘焙過黃豆粉,再放入膠隔中.

初次試整,祗係整咗6塊,唔敢做太多.

自己當然要試食喇,唔,,下次可以再減糖,再搓多一陣或加多啲木薯粉會煙韌啲.