自製手工檀香薑皂

我已經好耐無打皂,因為覺得皂液好用啲,又多變化可以隨意組合,事緣上星期去同朋友一間有機食生嘅店鋪,發現鋪內一角售買嘅手工薑皂,祗不過包含椰子油,可可脂之類,重量應該約70-100g左右,竟然賣到$100/1塊,嚇得我呀,那麼昂貴,所以今個星期某一天比較得閒,就搬出打皂工具,打了約600g皂,可切成6塊,其中兩塊已送咗俾朋友用,心情好似賺咗好多咁.哈哈!

提早預習夏日甜品_椰汁馬豆糕

事緣之前舊同事嚟我屋企學整雞批,買咗盒淡忌廉用剩,剛好明日會同朋友們食晏,趁機提早整椰汁馬豆糕用埋淡忌廉,咁就唔駛浪費咗.

雞批

昨日朋友專程嚟我屋企學整雞批,順便整個簡單晏晝招呼佢,因為由準備餡料,搓批皮,包餡同焗,需要要時間都幾長,我整咗芝士油醋汁蔬菜沙律,周打薯仔蜆肉湯,香草蒜蓉多士,幸好一切順利,但餡料同麵撈有多,叫朋友帶回家做實習, 但差不多成下午兩點先食,太肚餓忘記影埋湯已經飲晒落肚喇.

第一次收環酵+繼續再encore浸酵

由於舊年10月朋友晒果皮,將3X個柑肉俾我浸環保酵素,開始咗我嘅浸酵生涯,其實今年1月已到期可以用,但又唔等住用,所以延遲到新年後先收酵,但因為我當時用攪拌機打到變茸,當昨日要隔渣就大鑊,因為全部黏在絲襪上.要不停反轉襪底沖洗才可以繼續隔酵,以後吸取教訓,唔會打爛晒先浸喇,我用測試紙試過酵液,大約係弱酸性(4度左右),其實一個月前我已攞少少酵液加入洗頭水混合,果然頭髮洗完後,唔需要再落任何護髮素都好柔順,而且頭髮有光澤,亦嘗試加入自製沖涼液內,效果也不錯,但至於清潔爐頭,可能油漬太勁,效果並不算理想, 剛巧屋企人食生果,所以又開始再浸,預計5月尾可以有收成喇.

呢張係10月開始浸嘅相

剛收酵總共有2.5lte

今次果皮種類多啲,包括有火龍果,橙,香蕉

期待5月環酵BB出世

年初一晏晝

屋企話事人逢年初一定必要食嘅好意頭粥(生菜蠔豉瑤柱鯪魚球粥)+自家製糕點,好味!

恭喜發財! 羊年行好運!

一切從簡團年飯

由於較早前家族團年飯已經食咗,所以今日正日自己兩個人係屋企過,一切簡簡單單,無買雞同魚,淨係炆咗海參,鮑魚,蠔豉,冬菇廋肉一煲,煎蝦碌,炒豆苗,再燉螺頭桂圓廋肉湯,已經好足夠喇.

蒸糕日

今年比往年遲咗蒸咸糕,因為換咗個新雪櫃後,無咁大空間,又唔想擺咁多日,驚會變壞,預咗今日蒸糕,一早起身食完早餐後就開檔,又洗又切,卒之攪到成一點鐘先蒸完芋頭+蘿蔔糕,跟住順便炆餸,明晚團年食,早啲炆定入味啲.

新年糕點

今朝起身,即刻蒸咗底蔗糖椰汁年糕,我跟呢個食譜,係要隔晚浸粉先,第二日再將剩餘椰汁片糖水開稀粉漿,再過篩落糕盤蒸,好處係令粉+水充分混合,蒸出嚟年糕會軟滑啲. 另外奶奶每年都會炸芋蝦分俾各人,現在有姐姐幫手,所以就由得佢老人家整,而我們又可以坐享其成,不勞而獲,真好.

追加蒸黑糖馬蹄糕

上次蒸嘅馬蹄糕派晒都唔夠分,所以要追加繼續蒸多一轉,但係我嫌上次唔夠色,今次改用黑糖+冰糖,點知變成烏麻麻咁樣,希望收到朋友唔好嫌棄喇.

儲糧-長餐包

嚟近幾日要準備過年嘅野會好忙,而我每朝早餐都係食包,為免斷糧,要買出面麵包,所以提早焗定餐包放係冰格內,到時解凍就有得食,仍然用簡易搓揉+低溫冷藏法,不過就用咗日清個隻酵母,樣子都OK,不過焗盤太細唔夠位,有啲包包變咗形添.

芝麻麥餐包(簡易搓揉+低溫冷藏法)

剛買咗一本台灣作者出嘅簡易搓揉麵包書,其實同免搓揉方法差不多,祗不過佢會反覆用手搓揉幾次,但又未至於起到筋膜,室溫發酵一個鐘後,就放入雪櫃作低溫長時間發酵,最少12-18個鐘,然後攞出嚟室溫一個鐘,再造型就焗得,我由於用天然酵液種,所以放係室溫成4個鐘先放入雪櫃,前後總共成21個鐘,而且睇過西方免搓揉食譜,係要另外加2%小麥蛋白(wheat gluten)增加筋性,所以之前係美國網站買咗,今次當然有加,所以焗完試食麵包質感都唔錯,可以繼續試做.

焗/炸油角

我喜歡食油角,但奈何太油膩,唔健康,所以唯有忍口,但今年見到網上流傳焗油角,話口感不錯喎,於是又嚟跟風試整,但...結果係不如理想,焗出嚟角仔皮係死死實實,唔得鬆脆,最後剩低嘅就全部攞晒去"炸".

新年蒸糕mode提早啟動

事緣因為今個星期六為咗遷就各人,會提早食團年飯,奶奶係唔蒸馬蹄糕,所以諗住蒸俾佢,另外亦會同老友見面,所以又送埋俾佢,再有一位常常幫我代買粗重野嘅朋友,為表示感謝,都要送,所以剩低俾自己都係一舊糕咋,希望收到嘅人會鍾意喇.

午後什錦煎餅

由於昨日BBQ完,奄尖大少唔like急凍鮮魷,燒熟後剩番好多,所以今日用來切粒,加埋洋蔥粒,粟米粒,混入數字屋買嘅韓煎餅粉內,加入蛋液,水等攪埋一堆,就倒落pan煎,都好easy,又有得食,味道都唔錯架.

健康燕麥藍紅莓包

雖然現在自己健康都無乜大毛病,但防範於未然,所以平時飲食都盡量控制下,好似麵包咁,自從識整後,就可以減油,糖,今日整嘅都係,昨日發好麵團,我用天然酵母,低溫冷藏發酵一晚,今朝放係室內回溫,唔想咁單調,全部都係餐包,所以就攞一半麵團做個辮包.

紅莓燕麥黑糖果仁曲奇

其實係我烘焙生涯中,真係數唔夠5次焗曲奇餅,原因曲奇餅多數含大量牛油,如果落唔足又唔好食,唔想害自己,更加唔想害人,所以少整為妙,今次呢款有加麥皮,紅莓,果仁比較健康(自我安慰),主要送俾朋友食,我自己祗係淺嘗一,兩塊就好,因為想有益啲,落咗黑糖,結果賣相就爭啲囉.

今日燉蕉

感冒前買嘅生果,因為驚食生冷野會咳,全部唔食得要介口,但生果唔可以擺太耐,上網話冰糖燉蕉都可以止咳,食完晏晝就即燉,雖然味道怪怪地,唯有當飲糖水吧.

止咳第2回合-冰糖燉水梨

繼昨日鹽燉橙後,今朝見到仲有一個水梨,反正呢幾日都唔可以食生冷野,於是索性加冰糖燉,聽講都可以止咳,其實昨日唔止鹽燉橙,仲有含喉糖,不停口渴就飲陳皮焗熱水,所以今日已經好番好多,無乜咳嗽,但都想試多幾樣,可以斷尾,你們可能奇怪,點解我整咁多野止咳?都唔去睇醫生,食藥咪仲快,原因係我希望用自然療法止咳,好過長期倚賴西藥啫,因為我本身已經氣管敏感,食咗幾年止咳藥,甚至乎吸埋類固醇,現在已經無乜效,因此越來越要加重藥份量,先可以止到咳,我唔想咁樣繼續落去,祗好試用其他治療法.

鹽燉橙,可止咳?

我次次感冒後,跟住就不停咳,今次都唔例外,咳到成晚都瞓唔到,上次朋友已經介紹我試下,但見到都唔方好飲,寧願選擇燉洋蔥汁,今次見咳成咁,屋企又有橙,即管試下,果然又咸又酸,仲有澀味添,不過好神奇,現在食完後兩粒鐘,一聲咳都無,明日是否要再食呢?