中西合壁作品

好耐都無整蛋糕喇,自己近排因為心情有啲抑鬱,提唔起勁,又無特別原因,但呢個禮拜,因為好友喜歡呢款蛋糕,所以特別為佢哋而做.

紅豆慕士綠茶蛋糕,大家太熟,所以無整到餅面裝飾,就咁送走,不過佢哋話幾好食喎.

呢個芒果芝士蛋糕,就送俾遠道嚟香港親友食,希望佢哋鍾意喇.

最後係為我自己整黑糖豆沙卷,朋友去沖繩旅行番嚟,送俾我嘅見面禮黑糖,所以就攞嚟整包. 我用咗兩次發酵法,類似中種,所以外皮氣孔較大,不過食落煙韌,都好味架.

廢物利用-柑桔萃取液_洗髮&沖涼液

我之前食完柑後,就廢物利用,將唔要柑桔皮洗淨,烘乾,切碎用乙醇浸透做萃取液.

切碎咗柑桔皮

用乙醇浸約一星期就可以將汁液隔出做萃取液.

我試做咗柑桔沖涼液.

同埋檸檬洗髮慕絲,其實配方都一樣,祗不過在於泡泡劑和味道不同而已.

應節十字包

復活節應節食品除咗復活蛋,小白免外,仲有呢個十字包,咁多樣食品,我當然揀包嚟做喇.

其實材料同聖誕節士都倫包差不多,祗不過十字包搓成圓形,唧上十字紋裝飾,今次仲加咗用Rum酒浸軟提子,藍莓乾添.

包包最後發酵完成.

唧上裝飾十字麵糊.

焗好出爐嚕.....

撕開見到一絲絲架,因為用咗低溫中種發酵,所以麵包好鬆軟,玉桂香料味唔算太濃,唔錯.

近期DIY護膚品

之前用不同乾花浸嘅萃取液已經開以用得,所以做咗以下幾款護膚品,將以前買落個啲開始拋棄唔再用,希望皮膚早日健康,唔駛再俾不知名化學物料侵蝕.

呢款係用玫瑰花水加薰衣草萃取油,尿囊素,Vita E,薰衣草精油,乳化蜜臘加熱攪拌而成,不過真係攪到手軟,需時要攪15-20分鐘.

大盒自己用,細盒就送俾朋友.

除咗面霜外,仲做咗左邊個樽防曬乳液,用玫瑰花水,海洋深層礦泉水,荷荷芭油,保濕因子,海藻防曬萃取,玻尿酸,薰衣草精油,簡易乳化劑攪拌而成.

中間個樽係柔膚水,主要成份有訰水,茉莉玫瑰花萃取,膠原蛋白,玻尿酸混合而成.

我明日早餐－健康豆腐全麥方包

今朝打開雪櫃，發現之前係超市買盒裝豆腐就快過期，今日正準備焗麵包，於是將豆腐代替水份，加埋全麥粉，就成為咗呢個健康嘅豆腐全麥方包嘞。

準備作最後發酵

發到８成幾滿

表面灑上金黃玉米粉，就可以入爐焗嘞

點知......遲咗蓋錫紙，所以面燶咗啲添

好在仍然有內在美啫。

DIY 護膚品經歷

一路以嚟都覺得市面護膚品有好多化學成份,有時用一陣已經發覺唔妥,要拋棄唔敢再用,除咗價格昂貴外,自己皮膚比較敏感,試過一次用某日本著名牌子,塊面即刻痕癢,自此以後,呢隻牌子所有護膚品都唔敢再用,唯有自己逐隻試,將自己塊面當白老鼠咁.

幾個月前開始,係深圳書城買到幾本自製護膚品書睇,原來唔太複雜難整,又試過上網買咗自製潤唇膏,都係好容易整,卒之決定去工聯會報咗個課程讀,上完後好似學多好多生物,化學常識,唔同護膚品主要成份.作用,至於製造過程都唔太難,問題係唔可以大量製造,因為不含防腐劑,加上有植物成份,但整體都覺得好理想.

因為呢個課程側重教用植物萃取,分別用水,甘油,乙醇和油萃取,學咗梗係要自己試吓整喇,以下就係自己做嘅製成品或半製成品.

買咗呢一埋護膏品材料,包括有基底油,花水,精油,保濕因子,乳化劑等等,但都好貴架,超過$600以上.

呢啲係我自己做莘取液,包括有:

茉莉玫瑰花萃取水,蘆薈凝膠都有保濕功效,可以做爽膚水,精華素等等.

薰衣草萃取油,可以加入做面霜,乳液.

,

紫草萃取油主要做紫雲膏,其實除咗紅條紫草,仲加入咗當歸,白芷添.

白芷醋可以淡化暗蒼,去班.

製成品包括有:

洛神花爽膚水,除咗有洛神花萃取液,仲加入膠原蛋白,玻尿酸,搽完後覺得皮膚幾舒服.

上網買咗兩set材料做潤唇膏,基底油有甜杏仁油,荷荷芭油,蜜臘,精油,搽咗唔肥膩,又滋潤幾好,會自己繼續做,又平又啱用.

用紫草萃取油加山茶花油,乳化蜜臘做紫雲膚,用嚟搽有濕疹部位,藥材味都幾勁,功效比較溫和.

大盒自己用

細盒就送俾手部有濕疹朋友試用

薰衣草卸粧油,基底油加薰衣草萃取油再加Tween80, 用完再用洗面奶,非常乾淨,皮膚又唔會太乾燥,會繼續做同埋用.

沖涼洗髮泡沫液,用檸檬萃取加椰子起泡劑加水放入慕絲樽而成,由於上堂時為咗令佢可以兩用,用椰子起泡劑調配比例介乎中間,結果我覺得洗頭唔夠潔力,沖涼還可以,但就會唔似出面街買咁多泡.如果自己再做會分開調配.

最後一樣無相係染髮劑,祗不過買包指甲花粉加唔同濃茶.咖啡,或者木籃花粉開水搽係洗乾淨頭髮上,焗完一段時間再用水沖乾淨,不過染完後我發覺白頭髮色澤變咗橙啡色,有啲奇怪.

接住我已經報咗打皂課程同做併布,口金手工藝課程,以後若果有新製品再同大家分享,

今朝奄尖大少嘅早餐-韮菜肉蒸包

呢排奄尖大少狂加班,做到佢死死吓,難得今日休息,於是今朝專登整咗呢個韮菜肉蒸包俾佢做早餐.

肉餡昨晚已調味好放雪櫃,今朝切碎韮菜撈入去就包得,搓好麵團發酵5分鐘就可以開皮包嘞,再發酵15分鐘就可以蒸.

好快已經蒸好嘞,不過已經趁熱俾咗一隻奄尖大少食,佢話唔錯喎,不過我覺得最後發酵多5-10分鐘,可能會好啲.

睇吓自家製造,零舍不同,皮薄餡多架.

新鮮出爐熱辣辣雞批

整呢個雞批係因為上禮拜上完堂將剩餘批皮帶走,另外今日約朋友見面,趁此好機會梗係快啲整咗,唔好哂材料.

我早一日已經煮定雞批餡,放入雪櫃雪至比較硬身,又將批皮攞落雪櫃下格回軟.

包好雞批,掃蛋汁,叉洞,劃花紋.

將剩餘枇皮整曲奇餅,可惜無睇火,結果變炭,掉咗落垃圾桶.

焗好出爐嚕...但個焗爐火侯唔係咁好,所以上色麻麻,我諗應該中途再掃多一次蛋汁,會比較金黃,但應該仍然好好味,好鬆脆.我祗係留一個俾自己,其他送哂俾朋友食.

眾裡它尋

今日無無聊聊行入去一間買平價書嘅書店望吓,佢個度都有台灣書籍賣,竟然俾我發現咗呢本新出捲蛋蛋糕書,之前係台灣網誌已經有報導過,但計過運費差唔多等於書價,又覺得貴啲,幾次出旺角書店搵又搵唔到,點知今日係呢間書店發現到,而且仲有8折,所以即刻買咗喇.

我其實之前已經買咗呢個作者好多本書,覺得佢教材步驟都好詳細,跟住做,多數成功.

有好多種蛋糕體同不同餡料,混合一齊用,梗有一款啱自己.

隨書仲有兩隻DVD送,教做蛋糕體同蛋糕製成品,我要慢慢睇,瞭解多啲先開始跟住做.

好假班蘭椰汁豆沙卷

因為無買到班蘭葉打汁,所以落咗班蘭香油.點知重手過頭,結果顏色好綠好假,一啲都唔自然,落咗一半椰汁,一半鮮奶,而粉更加大雜會,將用剩中筋粉,溝一半高筋,一半低筋粉.

最後發酵,自己食就切長啲,食大舊啲.

蒸好試吓食,包組織都OK喎,唔太軟,啱我食,不過椰汁味唔算濃,班蘭味又唔太出,無新鮮葉咁好味.

係淘寶網買嘅新玩意

大家估唔估到呢個藍色架係乜東東呢?

答案係叫做脊椎舒緩架,主要作用係人瞓上去,用嚟舒緩腰骨,如果打直放係梳化或者電腦椅,可以支撐腰骨,唔駛咁攰.如果有興趣可以睇吓詳情,不過要聲明我無回扣收,亦唔係賣野,祗係想大家分享而已.

http://item.taobao.com/item_detail.jhtml?item_id=92980a9d2fce6919931c949613acf1f7&x_id=db2

 因為唔算貴所以買嚟試吓,其實香港YAHOO拍賣網都有得買,但計埋運費,差不多貴一倍,所以先係淘寶網買.



另外昨日仲去書局買咗呢本好耐之前已經想買蛋糕書.加埋呢兩日真係破費唔少.

大手筆-換手機

我部手機已經用咗成6-7年,好多功能都無,加上現在上烹飪課,會影啲相作為參考,所以決定換部新手機,趁昨日出去旺角,就行去"先達"睇吓,原本目標想買Nokia N86,因為相機有800萬象素,但原來實物好重同寬身,唔係咁啱女性用,後來同sales傾吓,就介紹我買同牌子,舊年出嘅N97 mini,雖然相機功能唔及N86,但都有500萬象素,試影都好清浙,但價錢就貴多成$700-800,最後決定豪一次,咁大個女未買個咁貴手機架.

呢款珍珠白色,sales話舊年聖誕先推出喎.

一打開個螢幕,直情眼花,主要係上網功能,GPS地圖等功能,仲可以用WIFI添,不過除咗少數政府免費場地,基本上要俾錢先可以用,佢係觸控屏幕,唔駛四圍襟掣先搵到啲功能架,或者可以用附送筆控都得,不過主要都係用手指點就可以.


除此之外,側邊滑開上層,下層原來係一個類似電腦鍵盤,仲可以用速成,真係啱哂我用.

睇吓影相都算幾清淅啩?仲可以zoom近鏡/遠鏡,同有閃光燈,自動對焦添,至於音樂/收音機個部份,音質都幾好,因為自己要求唔算高.

咁多野玩,我都要慢慢摸熟部機先至得囉,另外原因係部機咁貴,一定要好好用盡至得.