新年蒸糕程序啟動

屋企由細到大, 阿媽都係自己蒸糕+炸油角之類, 到自己一頭家時就開始學蒸糕, 油炸就無乜, 因為油炸完又唔可以循環再用, 幾浪費, 加上熱氣, 今年都唔例外, 前兩日蒸咗桂花紅棗千層糕,不過農夫忍唔到已經食咗一半, 今日再整埋芋頭+蘿蔔糕, 就可以收爐喇, 因為我唔係用機刨或手刨蘿蔔絲, 而係用手切, 所以都用咗幾多時間, 幸好試食後, 兩底糕都幾好味, 咁就值回票價.

桂花紅棗千層糕

今年唔想再蒸年糕, 就改咗蒸呢款紅棗糕, 首先要浸完紅棗乾再煲一陣, 由佢焗過夜, 隔出紅棗水後再將棗茸壓出汁液,再過篩幾次,功夫幾多,再將汁液加糖煲溶攤凍,同粉混合成粉漿,之後又過篩,再逐層蒸, 無耐性最好唔好蒸, 幸好味道唔錯, 如果減啲糖就更完美, 我嫌稍為甜啲.

攪攪震聖誕除夕早上

可能大部份人都開始或準備聖誕節慶祝活動,而我呢對節日感覺已趨平淡,所以祗係隨心做自己想做嘅野, 好似今朝就去整椰子油潤唇膏同紫雲膏, 仲趁空檔時間去蒸饅頭, 平淡又滿足,就係我現在生活寫照了.

應節聖誕麵包-St Stollen改良版

平時自己食嘅麵包,都係落植物油,但聖誕節就破例用牛油搓包吧, 但點都過唔到自己用牛油溶液搽面, 祗係灑糖粉係面就算,我又唔like香料粉味,所以無加,雜乾果就用屋企剩餘拔蘭地浸,一出爐味道好香呀.

菠蘿包+排包

雖則知道菠蘿包同埋排包唔係咁健康,多油多糖先好食,但間唔中都會被心魔引誘,唯有自己整減油又減糖, 自我安慰叫做健康啲.

DIY天然石榴糖漿

真係好耐無寫blog,原因係夏天天氣太熱,廚房又西斜,簡直生人勿近,現在開始無咁熱,見到網上教做石榴糖漿, 百100%無添加,話好處抑制動脈損傷,抵抗心臟病,生津止喝,潤肺止咳,所以就不妨試下做,主要加入飲品內或作調味糖漿,不過4個石榴,蒸餾成糖漿好少,得100ML左右,而且剝石榴籽都要用好多時間,加上又要打爛搾出汁液,蒸煮成糖漿都要成個鐘,是否值得晒時間做? 就見仁見智喇.

夏日消暑最佳拍檔

天氣咁熱,真係好難唔食雪條/雪糕之類,趁上淘寶買家庭用品,順便淘咗個雪條模,今日就同佢開張,整咗幾支椰汁紅豆雪條,真材實料,無添加,食得放心,仲幾好味,唔錯.

首次夜遊香港迪士尼

自從香港迪士尼開幕到現在,我從未去過,因為前幾年去旅行時,分別去過LA+東京成3次以上,加上票價咁貴,自己對迪士尼卡通人物興趣不大,所以就無打算去,今次適逢家人有免費入場卷,但天氣太熱,所以選擇黃昏時先入場,今日係平日關係,遊客不算多,機動遊戲都好快可以排到,但我無玩,祗係四圍行下,再去食餐預料中貴價晚餐,但唔等於好食囉,跟住戲肉就係等睇夜晚廵遊表演, 雖然人物唔太熟識,但燈光好靚,應該好睇過中午,之後就離開喇,祗係到此一遊.

新玩具-雪條模

近排日日都成34度,好鬼死熱,剛好又淘咗啲雪條模具,可以兩用,因為係矽膠做, 因此又可以焗蛋糕,見屋企有椰汁剩,於是買盒淡忌廉,實行整椰子雪糕條,但懶得用唧筒,結果哈哈笑個口整得唔靚,剩低雪糕漿就混合埋成一條,味道唔錯嘅,但由於無落雪糕乳化劑或者蛋黃,所以有啲沙沙地,唔算太滑,自己就可以接受.

新嘗試-咖哩炒蟹(少辣)

近排天氣咁熱,如非必要,真係唔想入廚房開爐,所以無乜可以post同大家分享,今日見雪櫃有半隻紅洋蔥剩下,突然又想食蟹,於是去買咗一隻大肉蟹返嚟,求其係網上搵個食譜,望望就開工,可能因為蟹有鮮味,又唔太辣,都幾好食喎,剩下蟹汁仲可撈埋麵食,一啲都無晒.