終於搬家成功了!!!!

上星期一開始已經同雅虎申請備份,點知我想得太簡單,雖然有同一文件類別(XML),但原來格式規格不同,嘗試咗好多次都失敗,但又唔甘心放棄,雖然轉咗過嚟未必有人睇,但無理由唔得,終於今日搵到幾位同道中人網友分享,我集合佢哋嘅做法,終於成功搬晒嚟新家,當然唔係百份百完整無缺,加上相片size唔吻合,所以要逐張再調整過,暫時祗係試驗性質發佈5X多篇,其餘以後再慢慢修復發佈喇.自古成功在嘗試,大家要繼續努力呀! :D

緣盡緣散

我自從2008年提早退下工作崗位後,上網發現可以在呢度寫blog,為咗唔想忘記練得好辛苦中文輸入法,亦都想記錄低自己呢幾年生活瑣碎事,所以就開始寫blog,雖然近年生活平淡,無乜可以寫得好密,但總喜歡睇到有志同道合嘅網誌,但免費呢樣野係隨時可以中止,所以雖然唔捨得,但都總要離別😔，日後我都會繼續寫blog,不過剛開始,唔知是否會繼續,如果搬家情況隱定後,會再通知大家新網址,現在帶著不捨心情同大家講"再見珍重",日後有緣再係另一個虛擬世界見面喇.

今日午餐-韓式紫菜卷

韓式同日式分別在於飯內無加壽司醋,而係加炒香芝麻,而包好後再掃一層芝麻油,好啱我呢種胃有問題又想食紫菜卷嘅人食,而餡料可以各式其式,見到雪櫃有乜就落乜去包.

紅棗黑木耳特飲

我對黑木耳無特別喜好,但上星期回奶奶屋企,佢塞咗好多俾我,原因係佢都唔鍾意食,我唯有帶番屋企,諗吓點煮好,上網見到台灣好流行呢款飲品,咁就一於試吓整,其實都好簡單,將黑木耳,開邊無核紅棗浸軟,換水後倒晒落電壓煲當湯煲至淋,稍為攤凍再放落攪拌機攪碎就OK,但其實攪完後膠質好重,要用水溝稀嚟飲,否則就似食糊糊.

健康食品-自製豆腐花和豆漿豆渣饅頭

見之前買咗包黃豆好耐,昨晚臨瞓就浸咗,今朝起身整咗豆腐花,見有豆漿剩,加埋豆渣蒸埋饅頭,一舉兩得.

自家種有機西瓜

我家奄尖大少又一傑作,而我祗係繞埋雙手,等食而已.今次個瓜都幾重,有成兩公斤以上,皮薄多汁又甜,好正!

新鮮藍莓果醬

幫朋友整嘅果醬,難得有人欣賞.

泰式魚蝦餅

久違泰式魚蝦餅-因為製作工夫比較繁複,而且要煎炸,所以都係偶而整一次,不過味道同泰式食肆有得揮.

日本燒餅

上兩星期阿信屋有7折優惠,趁買麵之餘,就順便買埋呢隻燒餅粉試吓,今日加一隻蛋,椰菜絲,煙肉/蟹柳混合一齊煎,味道唔錯喎,又幾好食.

自家種西瓜

唔知幾時先瓜熟蒂落食得呢? 我家主人傑作. 意外地唔止一隻,今年仲打到兩隻瓜喎. 

玫瑰花士多啤梨果醬 & 五谷雜糧麥包

係超市見到士多啤梨特價,忍唔住買嚟整果醬.

昨日打好麵團,今日剛焗好出爐嘅五谷雜糧麥包,就已經好好味,其實生活就係咁簡單.

自製蝦籽蛋麵

今日晏晝,搬番部麵條機出嚟開工,今次自製蝦籽蛋麵，不過始終無用壓麵機整咁煙韌.

雲尼拉杏仁雪糕

天氣好熱,終於忍唔住整雪糕食,加埋西瓜更加啖啖透清涼,正!

蜜糖榛子花生醬

為咗擺放時間長久些,同埋唔會壞,加上容易搽開,出面賣花生醬會落防腐劑,和含有反式脂肪植物油(白油),多食無益.

新嘗試-椰菜薯仔餅

用咗一個薯仔,加1/4椰菜,蟹柳,煙肉,全部切絲,再以雞蛋液,麵粉混合,煎第一塊時失敗,因為粉漿唔夠,油溫過高,於是立刻加粉,扭細爐火慢煎,所以第二,三塊都煎得唔錯,味道比較清新,我當晏晝食,可以填飽肚仔,另外半份留番另一餐.

中式饅頭+豆沙包

要補充奄尖大少糧食,趁勢就順便整幾個豆沙包俾自己食,豆沙係自己早一日炒好,自己整可以少油/少糖健康些,直但外皮始終豆皮,唔阿光滑,我諗可能同蒸汽溫度有關.

燻蹄

因為買咗新電壓煲,想試吓炆功能,另外自己亦都好想試整燻蹄,可惜煮得太淋,變成有好多碎肉捲唔實,味道都唔錯.

夏日口味果醬-芒果/金奇異果醬

昨日去超市見到有金奇異果賣,於是嘗試整果醬,但單一樣又嫌味道太寡,於是將屋企芒果加埋入去,味道酸甜又有香味,唔錯.

環保潮流-交換物品

而家興講環保,係網上什至有送自己唔需要物品俾人群組,我剛剛有兩樣唔需要而又全新電器,又識得其中一個熱心交換物品朋友,於是就換咗以下嘅糧油食品,真係各取所需呀.

消暑夏日甜品-椰汁馬豆糕

朋友送咗盒椰奶俾我,於是就整咗呢款我夏天最喜歡整嘅甜品.