檸檬戚風蛋糕

今朝一早起身,即刻焗咗呢個檸檬戚風蛋糕,因為晏晝約咗舊同事聚舊,想送啲見面禮俾佢.

呢個係17CM模,樣子都唔錯啩?

除咗有外在美,都有內在美架,切開睇吓,食落都好軟熟,但就小甜,因為我估計錯檸檬汁酸味,減咗糖,變咗小甜蛋糕,下次都係跟足落糖算嘞.

深圳購物日

今朝起身食完早餐,見到天氣都唔錯,近排因為去咗學口金,併布,DIY護膚品,所以想去深圳書城買啲書參考吓,於是就出元朗坐專線小巴去落馬洲,過福田口岸,順便買張深圳通搭車,唔駛成日搵散銀,咁就仲更加方便嘞.

出咗福田口岸直落坐深圳地鐵4個站,到咗少年宮站,由C1出口直行過去就係書城底層,真係好方便,唔駛上番路面.

底層買嘅係兒童,少年,初中,高中,電腦書籍,梗係唔啱我哋啲成年人喇,跟住就上電動樓梯去第二層,裡面啲書擺得好整齊,有好多指示或電腦俾人搵書,更加有坐位可以坐係度打書釘,而且唔多人,地方好大,又唔擠迫,真係好正呀.

買咗幾本啱心水書之後,再上多一層,係食野同其他商店.望番落去,睇吓幾大.

書城分咗兩個區域,呢邊係賣書.

另外呢邊賣CD,DVD,電子書籍等.

上多一層見到有間賣十字繡,併布嘅店鋪,以我性格,當然又要放低銀兩先走得喇.

係KFC食完過香港無得賣嘅蝦堡套餐後,又再坐番地鐵去福田口岸,轉搭巴士去之前係淘寶網搵到深圳賣家,賣咗部650W勁馬力攪麵機,因為用開個部已經俾我用到打咗柴嚕...問過佢哋服務熱線,淨係檢查部機都要收$70,仲要自己托去整,所以索性買部新機算吧.

係賣家鋪頭,其實係住家式經營,仲賣咗其他野添.

以下睇吓我嘅豐富收獲,包括有:

布料,絲帶,木鈕,鎖匙扣等等.

三本書

其他雜物,包括有可以磅0.01g電子磅,乳酪菌粉,角木合梳

最後出埸,梗係我千辛萬苦托番嚟重10kg嘅麵包機喇.

睇吓個箱就知幾大部.

打開箱.攞部機出嚟,賣家已經係我面前試過機,係OK先買.

附帶有其他配件,不過三塊黑膠蓋,唔知有乜用?,要遲啲研究吓先得.

檸檬吉士蛋糕卷

今日整定呢個蛋糕卷,預備明日送俾阿媽食,當興祝母親節.

蛋糕體用戚風蛋糕分蛋法,不過跟食譜落糖,覺得稍甜.

蛋糕片攤凍後,搽上檸檬吉士醬

跟住用保鮮紙捲實,不過始終細焗爐,爐溫太猛,捲完後有裂縫.

雪咗3個鐘左右,就打開保鮮紙.

切件後食番一件先,下次要減糖,稍甜,蛋糕都好軟熟,唔錯.

自己親手做嘅第一個口金包

今日上完第二堂,我做咗第一個口金包,其實如果略識"針紙"或裁剪就唔係好難做啫,我以前曾經學過裁剪,所以都明白老師講做法.

因為初學,所以布,口 金較,有關材料都係同老師買,遲啲如果有興趣,先自己再買布料嚟做,不過我自己就覺得手工麻麻,要工多先可以藝熟.

杏仁香蕉包

今日見到梳蕉已經熟到出梅花點,諗起前排見到網友整嘅杏仁香蕉包,個個都話唔容易整,咁等我又嚟趁吓熱鬧先.

 熟透梅花點香蕉, 一部份壓爛成茸加入麵團搓勻,一部份切片擺麵包面.

將麵團壓成方形放係焗盤內.

將杏仁醬均勻搽係面,杏仁醬係用牛油,糖,蛋,杏仁粉,少許麵粉混合而成.

然後再鋪上已灑玉桂砂糖香蕉片,輕輕按實,作最後發酵.

終於焗好出爐喇,我就嫌香蕉片稍甜,偶而換新吓口味都幾好.

杏仁吉士牛奶包

今次麵包係用咗北海道牛奶方包食譜再加老麵(100g),而為咗唔想咁單調,又做咗個加杏仁粉嘅吉士醬做餡料.

麵團發酵好後,分成等份,將小麵團搓成長條形,包入杏仁吉士醬,然後打結而成,作最後發酵.

留心睇火,適當時候蓋上錫紙遮面,終於係小心看護下出爐嚕....

攤凍後切開試吓先,麵包軟熟加埋有杏仁香味又唔太甜吉士醬,好好味呀!

炆-叉燒

我從來整叉燒都係用焗爐焗,焗完之後肉會較為乾身,見到靚靚媽咪話可以用鑊煮乾水份都得,難得有高人指點,梗係要跟吓喇.

今日買咗舊梅頭廋肉,飛走豬皮同肥膏,醃,咗約4個鐘,加水片糖,冰糖,煮至汁變杰身,好似糖膠,就熄火,撈起叉燒攤凍.

攤凍後就切件上碟,淋些少叉燒汁就可以開餐嚕....味道同焗出嚟差不多,不過無咁乾身,呢個方法真係幾好,唔駛專登開焗爐,仲要成日將叉燒翻身,大家有時間不妨試吓.

簡簡單單芝麻卷

唔知整乜包好? 翻開麵包書見到呢款簡單芝麻卷,係我第一次去學整麵包時學嘅麵包款,咁就一於整喇.

今次用咗直接法,個焗盤細,所以最後發酵完就迫實哂,搽上蛋漿,灑上黑白芝麻就可以焗嚕....

因為唔想焗得太燶,所以蓋咗錫紙,有少少鹹味,都唔錯架.

榛子百利甜酒芝士凍餅

之前買淡忌廉就快到期,加上仲有半舊芝士忌廉,於是今日就整咗呢款凍餅.

因為無諗住送俾人食,就整細份啲,用個細四方模.

雪硬後可以甩模,下層係百利甜酒,上層係榛子醬+榛子粉

做埋餅面裝飾

切開試吓,芝士餅夠軟滑,但百利甜酒味道淡啲,不過我都係鍾意食慕士蛋糕多啲.

蝦米香蔥花卷

我嫌淨係蔥花味道太寡,於是將浸軟蝦米切粒加入成為呢款蝦米香蔥花卷.

準備最後發酵喇...

蒸熟後,試食咗一個都好鬆軟,有蝦米粒鹹鹹地味道都唔錯喎.

中式包點-芹菜肉包

食哂之前黑糖豆沙卷,打開雪櫃見到有用剩免治豬肉,而蔬菜袛有芹菜,於是就將兩樣撈埋做餡,成為咗呢款芹菜肉包.

8個大包迫爆蒸籠呀!

切開裡面餡料比較濕潤,因為我懶,無將芹菜拖水先切粒,但新鮮蒸好即食,真係好鬆軟,味道唔錯,可能我今次改咗用多啲低筋粉,所以就無咁煙韌.

中西合壁作品

好耐都無整蛋糕喇,自己近排因為心情有啲抑鬱,提唔起勁,又無特別原因,但呢個禮拜,因為好友喜歡呢款蛋糕,所以特別為佢哋而做.

紅豆慕士綠茶蛋糕,大家太熟,所以無整到餅面裝飾,就咁送走,不過佢哋話幾好食喎.

呢個芒果芝士蛋糕,就送俾遠道嚟香港親友食,希望佢哋鍾意喇.

最後係為我自己整黑糖豆沙卷,朋友去沖繩旅行番嚟,送俾我嘅見面禮黑糖,所以就攞嚟整包. 我用咗兩次發酵法,類似中種,所以外皮氣孔較大,不過食落煙韌,都好味架.