頸巾作禮物

呢排天氣轉冷,剛巧經過冷鋪,見到勁粗嘅冷繩,最適合用嚟織頸巾,而且又快到聖誕新年,於是一口氣買咗四舊唔同顏色嘅粗冷,每日祗需要抽出3-4個鐘,好快就織好哂,趕及可以作禮物送俾朋友,物輕情意重,希望收到嘅人會喜歡啦.

中西式包一齊做

今朝原本祗係諗住焗麵包,點知奄尖大少突然話想食饅頭,難得佢主動話鍾意我整嘅野,考慮一陣,應承整饅頭,所以我變咗同一時間要整兩種中西式包,都有些少擔心,兼顧唔到不同發酵方法和時間,不過唔理咁多,開工至算嘞.

首先西式包係做伯爵奶茶方包,主要係用呢兩種有佛手柑味茶葉同埋茶包,將奶加熱沖入茶葉中,焗一陣,壓出濃奶茶同麵團材料一齊搓勻,而茶包剪開倒出茶葉碎同麵團混合.

仍然用低溫中種法,不過天氣寒冷,所以要將麵團放入盛有暖水嘅鑊裡面發酵,最後將空氣壓出後,將麵團捲成圓柱體放入麵包模內作最後發酵至8-9成滿,就放入焗爐焗. 焗好一打開爐門,就聞到好香佛手柑茶葉味.

攤凍切片,望吓都發得唔錯,食落就非常有茶葉味,如果鍾意飲呢隻茶嘅人,一定會鍾意呢款包,我就係其中一個嘞..

至於中式饅頭,我用兩次發酵方法,即係70%麵粉,酵母,水搓勻發酵兩個鐘先,然後將剩低30%粉,糖,少許油加入一齊搓至光滑,靜置約5分鐘後就可以用擀麵棍來回壓出氣泡,鋪上芝麻餡同預先煮淋隔去水份紅豆,呢個係應奄尖大少要求咁做.

捲實成圓柱體,切成等份,放入蒸籠作最後發酵.

蒸完後,因為紅豆太多,令到中間有空隙,所以中間位置鬆開,唔得緊密,表面仍然有豆皮,呢部份除非用壓麵機或改用泡打粉代替酵母,先可以改善到.奄尖大少話好食喎,至緊要佢滿意就得啦.

總刮嚟講,同時整兩樣包都叫做OK.

再試新機-芝麻杏仁茶

天氣繼續寒冷又天陰,唔想出街,於是又攞部機出嚟試打芝麻杏仁茶.

我將芝麻炒過,杏仁焗過,等香味可以多啲.

將芝麻,杏仁,300cc滾水,少少冰糖粒放落攪拌杯中.

高速打完10秒,覺得仍然好粗粒,再打多約20秒,已經變成粉末狀,汁液比較濃稠.

開水籠頭,將汁液放出,隔去泡沫,咁就可以飲嚕....,但跟食譜杏仁份量,味道唔夠濃,所以再加多一倍杏仁打多一次,今次好味好多,咁凍天時飲,真係好正.

見到攪拌杯中杏仁粉末唔好浪費,於是將粉末倒落細煲中,加少少水,糖慢火煮滾,加粟粉煮成糊狀,成為杏仁糊食埋唔好哂,不過味道已經淡好多囉.

試新機-生物精華萃取機

兩日前係工展會買咗部昂貴嘅生物精華萃取機,當然要試機睇吓係咪好似做示範咁掂啦?

第一樣試嘅係蔬菜汁,包括有:西芹一條,青瓜,苦瓜(去核,括囊)一小段,用水沖洗後,再用凍滾水過一次.

然後將蔬菜,一茶匙蜜糖,200-300cc凍滾水放入攪拌杯中,鎖好杯蓋安全掣.

按"AUTO"掣,自動設定為打4秒,停2秒,連續5次,再不停打30秒,自動停機,有烏鳴聲提示,按熄"POWER OFF"開左手邊水掣,用杯盛住流出汁液飲用.

攪完出嚟大約有我相中嘅水杯一杯半,飲落蔬菜果然攪到好溶,完全感覺唔到係渣,祗係蔬菜蓉,甜甜地,成杯飲哂唔駛浪費,真勁!

第二樣試嘅叫五寶葯膳湯,藥材有北耆,人參鬚,麥冬,紅棗,南棗(可以唔駛去核),全部洗淨,用滾水浸泡一陣.

將隨機附送隔網插入攪拌杯中,將浸泡過藥材,少許冰糖,300cc熱滾水一齊放入杯中.

按"PULSE"高速掣10秒,放水掣,用杯盛出汁液飲用,但我想濃稠啲再打多20秒,結果太溶,太杰,抯住出口隔篩,汁液流唔到出嚟,祗好成杯倒出,自己用隔篩壓汁出嚟飲,份量加埋有兩水杯,味道就有葯材味,不過唔係太濃,少甜,都OK.

睇吓啲渣滓打到真係好溶爛,至於清洗都好方便,除咗基座外,全部都可以拆出來洗,用水沖乾淨就攪掂,至於隔網就要用牙刷刷去潛藏微粒.

總括而言,效果幾理想,若果有恆心,成日打汁,或藥材湯,杏仁糊之類,呢部機應該值得買.

楓蜜栗子方包

今日天氣轉冷又陰天,都唔係好願出街,所以就留係屋企整包,呢款包整過幾次,所以都無乜難度,繼續用低溫中種,即係將70%筋粉,加水,酵母,少少鹽搓成團後放係雪櫃內發至少16-17個鐘.

將新鮮栗子煲15分鐘後,去殼去衣切粗粒,最後整形時將栗子粒鋪係壓平成長方形麵團上,捲成圓柱體,放入麵包模內,合上模蓋,作最後發酵至8-9成,就可以放入焗爐焗.

焗好出爐嘞..,未頂角所以旁邊係白色.

切開方包,鬆軟到跌哂係度,至於味道嘛,唔太感受到有栗子味,因為我買個隻栗子蓉唔掂,今次旨在清貨用埋佢,預咗唔夠味,麵包就無問題,切咗幾塊俾朋友食,佢話"Good".

工展會半日遊

今日又係天陰不過落唔出雨,一早做好家務後,即刻單人匹馬搭車去行工展會,以往幾年都係約埋朋友一齊去,但因為要遷就佢哋食晏時侯去,結果加埋係入面食野,行約45分鐘就要鬆人,基本上祗夠時間行一圈,好多野未睇清楚,哂咗入場費,所以今年決定一個人去,可以唔需要睇時間.

我係由天后興發街入口進入會場,未入去之前,當然要買入場卷,仲有場刊送.

記住最好立即翻開場刊後面優待卷睇吓有無自己想買嘅野,可能會平啲或者有贈品送架.

由於我入場時間尚早,所以可以行近檔攤睇示範或者試食,但一過咗下午一點後,好多窄巷地方就擠得水洩不通,尤其是賣零食,醬油,粉麵地方,由於好多攤檔都做示範,開哂擴音機,都幾嘈架,卒之我行咗差不多3個鐘,包括10分鐘企係度食腸粉,魚肉燒賣,買杯野一路行一路飲,真係無浪費時間.

好嘞,最後睇吓我買咗乜野番歸? 其實買咗好少野,不過價錢就.....

包括有泰國札肉5條,用優待卷減咗$5,兼送冷藏袋一個,蜜糖係平時飲開嘅牌子,平過超市$10,所以又買多一樽,不過要買兩樽先可以用優待卷平多$5,所以即係無優惠.

充

登..登主角登場啦,原本想去睇吓智能煲,結果買咗呢部昂貴嘅生物精華萃取機,原因係我每日自己都會榨五青汁飲,但渣滓太粗鞋,唔食得,亦即一大半營養都吸收唔到,我企係度睇佢哋做示範,亦有試飲,假設自己可以日日用呢部機,應該都會值得嘅(係我自己說服自己買機理由),而且用場刊優待卷加多$1,就送埋部榨橙汁機,有一本食譜,光碟送,教人點用部機,仲可以打埋豆漿,芝麻糊之類.

打開箱,睇吓部機有兩個隔篩網,一個水漏斗,一個隔渣布袋.

仲可以裝埋個水籠頭添,希望真係用得番夠本,因為唔想一次過攞咁多錢出嚟,所以就碌卡,結果做咗6個月免息分期,啱啱係自己用開個張信用卡先有得做咋,係咪有啲自欺欺人呢?

環亞佳餚精選課程-第十課-鳥結糖&甘荀提子鬆餅

眨眼之間已經上到最後一堂,今日學嘅野比較簡單,就係鳥結糖&甘荀提子鬆餅.

鳥結糖主要用呢隻粟膠加牛油,砂糖煮溶至120度.

跟住用另外一個鐵兜打起蛋白加糖,當粟膠糖漿煮好後,倒入蛋白內,加入已焗香成粒杏仁,快手攪勻,倒入已鋪焗爐紙嘅平底盤內,再蓋上另一張焗爐紙,用手壓平糖漿,再用另外一個平底爐壓上糖漿面,令糖漿更加平均. 攤凍後,用刀切條長條狀,再切細塊,用米紙包完後,外面再包一張顏色玻璃紙.

食落唔係好甜,杏仁好香口,不過糖比較軟身,我自己鍾意食硬糖多啲,我都幾鍾意食鳥結糖,但係都唔好DIY,如果唔係我會食到唔停口,咁就慘嚕...

至於甘荀提子鬆餅,首先要將紅蘿蔔去皮刨絲,乾提子切條,牛油加糖打至鬆發後,分數次加入蛋,最後加入奶,自發粉,甘荀絲,提子乾撈勻,就放入紙模內.

好快焗熟就可以出爐嘞...不過味道較為平淡啲,如果我整會用香蕉合桃,會好食好多.