桂花紅棗千層糕

今年唔想再蒸年糕, 就改咗蒸呢款紅棗糕, 首先要浸完紅棗乾再煲一陣, 由佢焗過夜, 隔出紅棗水後再將棗茸壓出汁液,再過篩幾次,功夫幾多,再將汁液加糖煲溶攤凍,同粉混合成粉漿,之後又過篩,再逐層蒸, 無耐性最好唔好蒸, 幸好味道唔錯, 如果減啲糖就更完美, 我嫌稍為甜啲.

攪攪震聖誕除夕早上

可能大部份人都開始或準備聖誕節慶祝活動,而我呢對節日感覺已趨平淡,所以祗係隨心做自己想做嘅野, 好似今朝就去整椰子油潤唇膏同紫雲膏, 仲趁空檔時間去蒸饅頭, 平淡又滿足,就係我現在生活寫照了.

應節聖誕麵包-St Stollen改良版

平時自己食嘅麵包,都係落植物油,但聖誕節就破例用牛油搓包吧, 但點都過唔到自己用牛油溶液搽面, 祗係灑糖粉係面就算,我又唔like香料粉味,所以無加,雜乾果就用屋企剩餘拔蘭地浸,一出爐味道好香呀.

菠蘿包+排包

雖則知道菠蘿包同埋排包唔係咁健康,多油多糖先好食,但間唔中都會被心魔引誘,唯有自己整減油又減糖, 自我安慰叫做健康啲.

DIY天然石榴糖漿

真係好耐無寫blog,原因係夏天天氣太熱,廚房又西斜,簡直生人勿近,現在開始無咁熱,見到網上教做石榴糖漿, 百100%無添加,話好處抑制動脈損傷,抵抗心臟病,生津止喝,潤肺止咳,所以就不妨試下做,主要加入飲品內或作調味糖漿,不過4個石榴,蒸餾成糖漿好少,得100ML左右,而且剝石榴籽都要用好多時間,加上又要打爛搾出汁液,蒸煮成糖漿都要成個鐘,是否值得晒時間做? 就見仁見智喇.

夏日消暑最佳拍檔

天氣咁熱,真係好難唔食雪條/雪糕之類,趁上淘寶買家庭用品,順便淘咗個雪條模,今日就同佢開張,整咗幾支椰汁紅豆雪條,真材實料,無添加,食得放心,仲幾好味,唔錯.

首次夜遊香港迪士尼

自從香港迪士尼開幕到現在,我從未去過,因為前幾年去旅行時,分別去過LA+東京成3次以上,加上票價咁貴,自己對迪士尼卡通人物興趣不大,所以就無打算去,今次適逢家人有免費入場卷,但天氣太熱,所以選擇黃昏時先入場,今日係平日關係,遊客不算多,機動遊戲都好快可以排到,但我無玩,祗係四圍行下,再去食餐預料中貴價晚餐,但唔等於好食囉,跟住戲肉就係等睇夜晚廵遊表演, 雖然人物唔太熟識,但燈光好靚,應該好睇過中午,之後就離開喇,祗係到此一遊.

新玩具-雪條模

近排日日都成34度,好鬼死熱,剛好又淘咗啲雪條模具,可以兩用,因為係矽膠做, 因此又可以焗蛋糕,見屋企有椰汁剩,於是買盒淡忌廉,實行整椰子雪糕條,但懶得用唧筒,結果哈哈笑個口整得唔靚,剩低雪糕漿就混合埋成一條,味道唔錯嘅,但由於無落雪糕乳化劑或者蛋黃,所以有啲沙沙地,唔算太滑,自己就可以接受.

新嘗試-咖哩炒蟹(少辣)

近排天氣咁熱,如非必要,真係唔想入廚房開爐,所以無乜可以post同大家分享,今日見雪櫃有半隻紅洋蔥剩下,突然又想食蟹,於是去買咗一隻大肉蟹返嚟,求其係網上搵個食譜,望望就開工,可能因為蟹有鮮味,又唔太辣,都幾好食喎,剩下蟹汁仲可撈埋麵食,一啲都無晒.

收成繼續有來

繼昨日第一瓜後,今日農夫又摘多一個,相比昨日那個,呢個比較大,可惜瓜未成熟時,曾經被昆蟲蛀咗少少又生番埋口,好似人咁有咗個疤痕添,好似兩隻品種唔同,農夫未開嚟食,所以暫時唔知味道如何?

今年收成第一瓜

我家農夫今年5月已經磨拳擦掌裁種西瓜,由於成個5月都幾熱,適合西瓜成長,眨下眼已經開花結果,奈何由於農夫堅持唔肯落殺蟲藥,結果導致之前已經有3個西瓜被蟲蛀壞要掉,佢好心痛,今日終於收成正果,有一個雖然未十分大,都立刻堅持摘咗先,以免前功盡廢.

又嚟青咇咇班蘭...

上次我整班蘭方包同埋班蘭椰汁奶凍,我pose咗去FB後,朋友見到話佢好鍾意班蘭味道,問我可否整俾佢食? 既然咁俾面,出到聲梗無話唔得嘅,前幾日買到班蘭葉,今日就開工整喇,今次焗戚風蛋糕同埋椰汁奶凍,希望佢欣賞喇.

生煎牛肉包

今日煎咗牛肉包做午餐,可惜個別煎得比較燶,所以祗好去皮食,為咗唔想落雞粉/味精之類,今次買咗新鮮牛肉自己啄,而其他材料仲有冬菜/洋蔥粒等等,都幾好食,唔錯.

紫雲膏

如果有做開DIY護膚品嘅人,應該無人唔識紫雲膏,主要功效係消炎殺菌,但我自己用又唔覺得坊間講到咁神奇喎,祗不過既然識整無理由買啫,今次用嘅油係橄欖油,無用芝麻油,因為太肥膩,對皮膚唔好,我添加咗當歸片,白芷一齊浸咗8個月左右,加埋蜜蠟熱溶入紫草浸泡油就完成.

養生黑糖雜糧饅頭

繼上次用預拌粉焗麵包後,今次試下蒸饅頭,係網上睇到食譜話可將黑糖煮至焦糖,味道會香啲,我又試下煮黑焦糖,不過又唔覺分別好大,另外自己又添加龍眼乾+杞子,隔晚放入焦糖漿內浸泡,用時再隔走糖漿,捲入饅頭內,今次用番自己喂粉酵種液,要發成兩個半鐘頭呀,不過蒸完試食,味道又幾好喎,唔錯.

無事忙嘅一天

唔知點解而家無野做,理應慢慢享受一下生活,但我總好似唔停得咁,成日都會搵啲野整下先安樂,正如今日咁,本來因為上星期買了一排特價3盒淡忌廉,到咗25/4已經到期,還剩低一盒,見到芒果當造,唔駛諗梗係整我最鍾意食嘅芒果布甸喇,之後仍然好似仲有興致,於是又打咗幾盒薰衣草橄欖油護手霜,因我自己習慣每洗完手,清潔碗碟等工作後,一定會搽番啲護手霜,好好保護自己對手,因為手係最容易被人察覺年紀特徵兆之一嘛.

雜糧方包

朋友知道我鍾意整麵包,因此投我所好, 送咗一包有機雜糧預拌粉俾我,當然要試下效果如何? 今次我用自己喂粉酵種液,前後發酵+焗,總共要8個鐘.

今日青咇咇

我講嘅係斑蘭汁,之前用剩想清倉,於是諗計用晒佢,結論就係嘗試蒸饅頭,同埋整甜品斑蘭奶凍.

好味,但...肥到爆標嘅排包

之前應承咗老同學焗麵包俾佢試食,今日有聚會,所以就兌現承諾喇,排包要好食,一定要用不健康材料,例如蛋黃,牛油,淡忌廉等等,對於我標準就係肥...囉,幸好唔係成日整,自己都要試食先送俾人,所以食少少喇(哈哈!自我安慰).

天然無添加無患子皂液

朋友知道我鍾意DIY手工皂/皂液,因此送咗一大包無患子乾果殼俾我,無患子果皮含有豐富皂素,浸泡後再煲滾冷卻,隔出汁液就係皂液,可以用作洗頭沖涼,清潔之用,而且果皮可以晒乾後再循環用,係非常環保嘅,而且做法都好簡單.