今日晏晝-蒸粉果

啱啱睇見阿蘇家姐教整蒸粉果,令我唸番細個時屋企無乜錢,但我媽媽成日都整好多不同種類嘅野俾我哋幾兄妹食,其中包括蒸粉果,所以為咗懷念童年回憶,今日就蒸咗粉果做晏晝.

首先要準備粉果餡材料,全部都要切碎成細粒,包括有雲耳,沙葛,荀,紅蘿蔔,瘦肉,冬菇,芫茜等.

炒熟餡料攤凍,但最好將豉油碟或且細碗仔放入兜底,先將熟餡放入,咁就可以將水份隔走.

今日貪快,將澄麵/生粉團趁熱搓勻後,就碌薄再用模吸出成粉皮包餡.

將包好嘅粉果排係已掃油碟中,就可以攞去蒸啦,最前面中間個隻有鎖邊就係我媽以前整嘅款,但要化好多時間鎖邊,我祗係將邊禁實就算.

蒸約5分鐘就可以攞出來,再攤凍5分鐘就可以食啦,雖然未必百分之一百似足我媽整嘅味道或樣子,但已了卻我懷舊之情,其實味道都唔差架,唔...都幾好食.

蒸中式什錦甜包

因為已經食哂麵包,明日無麵包做早餐,加埋上次叮番薯片剩低嘅蕃薯,我將佢蒸熟壓成蕃薯餡&之前嘅吉士/蓮蓉餡,就蒸咗中式包啦,今次係用老麵團發包.

首先昨日已經係雪格攞咗呢舊老麵團出來回溫,臨訓前再加埋麵粉&水搓埋一齊,直至軟熟為止,咁就用保鮮紙蓋面,擺係廚房直至今朝,但可能天氣凍關係,仍然無乜發酵嘅現象,因此又將佢擺,係露台哂太陽,直至晏晝,叫做發得好啲,總共用咗成18個鐘頭.夏天就唔駛咁耐.

跟住再將佢同主麵團材料混合再搓勻至軟熟為止,主麵團材料有中筋粉,泡打粉,臭粉,枧水,砂糖&油.

當同主麵團混合後搓包期間,會現粉團內氣泡較比落伊士發嘅多,不過搓一陣後,氣泡會消失,麵團亦比較柔軟,擺佢一陣約30分鐘再搓幾下,跟住就可以包餡整形啦.

餡料包括有紫心蕃薯,蓮蓉,吉士餡三種

長形嘅係蕃薯,圓形摺向上嘅係蓮蓉,反轉圓形嘅係吉士,包好後放入蒸籠,擺係有熱水已熄火嘅鑊上面焗15-20分鐘先開火蒸.

蒸大約12-15分鐘就熟啦.

全部蒸完總共有10個包,可以食幾日,因為落咗枧水,又無用漂白嘅美玫牌麵粉,所以包蒸完後有啲黃,但唔影響味道嘅.

切開包入面,都發得唔錯,但食落覺得包皮始終無夏天發嘅時候咁鬆軟.

再戰豉油雞

今日奄尖大少放假,佢要求我買隻新鮮活雞俾佢親自操刀浸製,佢認為自己人食唔需要原隻浸,又要將雞翻來翻去咁麻煩,所以佢將雞對胸斬開兩邊,然後放入豉油雞汁中浸.

當豉油雞汁中一滾起,即熄火用瓦碟壓住,唔俾隻雞浮起約20分鐘就浸熟啦.

攤凍斬件就可以開餐,食後雞發覺脾部份非常嫩滑,但雞胸就比較鞋咗啲,我覺得佢呢個方法都幾好,但應該將雞胸向上,而雞脾/翼就向下浸,咁隻雞就應該成隻都咁嫩滑啦.

甜品蛋糕技巧班-第一堂-香蕉朱古力批

今日又開始上新課程,主要都係焗蛋糕&甜品,第一堂教嘅呢款係香蕉朱古力批,係比較簡單嘅一種甜批.

首先當然係要搓批皮,因為係朱古力批,所以批皮加咗無糖可可粉落去搓

批皮碌薄入模後要叉洞先好放入焗爐焗,否則批底會漲起.

Miss同場教埋我哋用撻殼焗,呢兩個就係我自已整嘅撻皮,但原來搓得撻邊靚唔容易,要有技巧,Miss示範咗好多次,我哋先搓得比較好啲.

跟住用牛油,朱古力坐溶後,加入淡忌廉同蛋液成為朱古力餡漿

切香蕉成粒狀或片狀入撻模或批模底層

跟住注入朱古力漿,再將泡消去,就可以入焗爐焗

焗好出爐啦,而家見到個面漲起,其實凍咗之後,就會下陷啲,變番平實.

除咗一人有兩個撻攞走外,仲可以當堂每人有一件試食,都幾好味,一啲都唔覺甜,但其實係陷阱,因為我哋知道朱古力漿入面加咗唔少牛油,但最慘食落一啲都感覺唔到,所以呢...真係唔好食咁多蛋糕或甜品呀!

唔駛用叮叮薯片機自製健康薯片

今朝去開超級市場,順便買咗一個薯仔&兩個細嘅紫心蕃薯,準備用微波爐來叮薯片&蕃薯片,雖然好多網友話個部薯片機好用,但我又唔多鍾意食薯片,所以用咗以下呢個方法叮,都一樣掂喎.

材料有薯仔同埋紫心蕃薯,工具就係呢部食物處理機,刀片要換上片皮功能,之後洗乾淨薯仔&蕃薯,批皮後,原隻放入中間個煙囪中間,開掣唔駛30秒就會自動將薯仔&蕃薯批成薄片狀

跟住用竹籤串起一塊塊薯片,用玻璃兜盛住,一齊放入微波爐叮,玻璃兜主要係"long"起一串串薯片.

呢度係一個薯仔嘅份量,不過呢個係反面教材,因為叮咗5分鐘後,有啲薯片軟身後就黏埋前面個塊,要用手逐塊分開,所以應該唔好太貪心,串咁密咁多,要有啲距離,盡量唔好俾佢黏埋一齊.

我係用高火(1000度)去叮約8-9分鐘,就聞到好香薯仔味,由竹籤剝佢落來,攤凍就食得lu...

另外又叮咗蕃薯片,祗係用咗5分鐘.

食後發覺唔係所有薯片都咁脆,同街出面買嘅炸薯片好唔同,祗係一半半咋,有啲比較煙un,但若果再叮就會燶變深啡色會苦,至於蕃薯片就超硬,唔好食,佢哋個買點主要係無油健康而已,對於鍾意食零食又怕肥嘅人,都可以講係望梅止渴嘅.

蒸荀尖蝦餃

今日無乜特別野要做,又唔想去街,去街市買野煲湯時,順便買咗一斤急凍海蝦,番來溫故知新包蝦餃,對上一次,由於皮太厚,唔得通透,睇吓今次改良後會變成點?

蝦餃餡有出過水嘅荀粒,剝殼索乾水蝦仁同埋蛋白

將蝦仁切粒加鹽,胡椒粉搓至起膠,再加入荀粒,麻油&蛋白攪勻,放入雪櫃雪凍待用.

將滾水撞入澄麵粉&生粉中,焗一陣,再將餘下嘅生粉倒入其中,加冷水搓勻成軟滑粉團,再搓成數條圓長形狀,切約10g重一粒,用已搽上油嘅拍皮刀(兩邊刀鋒都未開嘅刀,係上海街有得買),壓薄成圓形粉皮,睇吓我初期壓到幾肉酸,又厚薄唔均勻.

跟住中期就比較似樣.

到咗後期就漸入佳境,睇吓已經好圓,同埋厚薄均勻.

包好就可以蒸啦,正宗摺法應該要有8摺,但以我啲3腳貓功夫梗係無啦,形狀更加參差不齊.

第一籠因為唔記得時間,蒸耐咗,啲皮淋哂

第二籠記得蒸5分鐘就夠啦,當堂無咁樣衰,似番啲樣

攤凍後仍然好通透,至於食味就無酒樓嗰啲咁多汁,因為我無落肥豬肉粒,我寧願揀無咁好食,好過唔健康囉.

坦白講拍皮同包餡真係難度幾高,需要多多練習先會包得靚.

雙色方包

我見係日本麵包網站,登咗呢個雙色包食譜,見都幾好,況且我又未整過雙色包,所以今日試吓焗.

首先用綠茶粉&紅蘿蔔汁分別搓咗兩舊粉團,原著係用菠菜葉攪爛搾汁,我嫌麻煩,所以改咗用綠茶粉.

同平常一樣,經過第1&2次發酵,放氣後,將麵團各分成3份,再搓成長條形

相間地放入麵包模中作最後發酵

發到8-9成滿,就可以放入焗爐焗

呢兩個就係焗完之後嘅側&正面

原本係相同份量麵粉,但發完後唔知點解紅蘿蔔個邊比較多,而綠茶個邊好似無咁發,應該係格仔樣,但而家變成唔知乜樣,但幸好食落都好軟熟無乜差別,祗係形狀唔得靚仔.