三角口金包

呢款口金包係課程最後嘅一款,市面好難搵到呢款口金架,老師話要搵專人訂造.

原本老師教係側面返口,但發覺夾唔穩袋口,所以自己改為係頂部做返口.

再捲縫埋返口,插入口金鐵線,而下方度好位,縫好拍鈕.

將上間掛飾沿口金鐵線向下拉,同拍鈕合埋就成為三角形口金包,但實際並唔係咁好用,口金鐵線插入布內,並不容易,而且令裡布損壞,我會嘗試用Kelly口金包書所教方法再做,睇吓可唔可以改善上述問題.

免搓甜麵包

天氣咁熱,其實最啱發麵包,但奈何熱到直情唔想郁,最好就做呢款免搓包, 好簡單隔日將所有材料撈勻,用塗油保鮮袋索緊口袋,放係雪櫃一日,攞佢出嚟室溫回暖,作最後發酵,放入焗爐焗就攪掂,真係乾手淨腳.

麵包組織都OK架,口感同直接法所做麵包差不多,所以原來麵包唔一定要搓嘅.

手工皂

今日終於上完10堂手工皂課程,短期都唔會再學同類課程,原因係祗要識咗基本配方後,就可以運用自己想像力加材料配搭,自由發揮空間好大,我又無興趣玩渲染或用皂基玩不同製成品,以現在自己所學,應該可以夠用喇.

睇吓上堂學嘅製成品, 包括有由前排左至右, 椰子油皂(用作洗衫,洗碗,清潔力強),棕櫚油皂(中性,可沖涼,洗頭,潔力稍強),橄欖油皂(適合乾性皮膚用,滋潤),超脂皂(額外再加卯磷脂作超脂油份,所以性質同橄欖油皂一樣),中排由左至右,五油皂(即含有5種不同營養成份油做成), 雞蛋皂(用雞蛋做超脂),朱古力渲染皂(用食得黑朱古力加皂液劃線,不過由導師示範), 再生香蕉皂(刨椰子油皂成薄片加油,香蕉茸搓成球狀). 後排由左至右, 薑蜜皂 (加入蜜糖,薑粉,檀香粉,不過我覺得成皂後味道似麥香餅多啲), 最後就用皂基加入不同顏色 和模具,可以造成不同形狀.

呢啲就係用皂基加入不同顏色做嘅製成品嘞, 係咪好靚呢?

攪鬼比堅尼泳裝皂,係導師帶番嚟俾我哋參考, 唔係即場做架.

一氣呵成-香蕉蛋糕&藍莓奇異果醬

今朝見到檯面食剩一隻梅花點香蕉,於是就用咗佢嚟焗蛋糕.

呢個蛋糕都好健康,因為祗係落咗一湯匙芥花籽油,蛋,糖,蜜糖,麵粉咋,但可惜蓋錫紙時遮唔哂攪到變咗鍾無艷,一邊比較燶.

又心急甩模,結果個底起得唔夠平滑,好彩自己食就無問題喇, 但都唔影響蛋糕味道,唔太甜又軟熟.

跟住做開唔好俾自己停,將有人嫌酸藍莓加埋金奇異果切粒,加入砂糖醃一陣.

煮到夠杰身,就加入麥芽糖再煮,最後加埋粟粉水就完成喇...自從識煮果醬後再無買出面果醬,自己整100%真正生果,健康好多架.

十元店掃貨

我趁今日下晝比較得閒,於是就去十元店巡視吓,結果掃咗呢堆野返屋企.

全部都係做手工藝材料,包括塞棉,不同顏色絨布,袋膠手柄,3條不同顏色尼龍帶,可以做側背包或手挽包,仲加埋我至愛黑糖米通添.

爐甘石消炎止痕膏

之前同學仔做咗呢隻藥膏俾我試用,發覺效果都唔錯,於是問佢攞咗配方,買齊材料實行DIY開工嚕....

我用咗金縷梅花水,甘油,紫草萃取油,乳化臘,爐甘石粉,氧化鋅,精油就用咗羅馬洋甘菊,尤加利樹, 呢度份量應該可以用好耐吓.

芝士粟米山形土司

好耐都無整個呢款包,今次仲加料"芝士",睇吓好唔好食,我將一半栗米粒打爛成蓉同麵團撈勻,另一半就原粒捲入麵團內,仍然用低溫中種,外面滾上玉米粉.

眨眼就焗好喇,不過由於有少許芝士溶咗漏出嚟,變咗好似豆皮咁.

不過隔夜切開後仍然鬆軟好食,幾好喎.

手作筆袋

原本唔諗住不再做拼布,但上堂時見到同學仔個個都好努力,埋頭苦幹,於是就揀咗個比較簡單筆袋做,但仍然要化咗幾日時間先完成.

行深水埗有收穫

因為近期去學拼布同埋口金,所以趁今日去開旺角.順便去埋深水埗,睇吓有無材料啱買,由深水埗地鐵站A2出口,沿北河街行去汝州街,基隆街一帶,非常多店舖,真係花多眼亂,結果行咗差不多兩個幾鐘,買咗以下呢堆野.

包括有4塊布(一碼一塊),兩個線轆,5條拉錬,一埋裝飾木公仔,一包花鈕,,幾條織帶,棉繩, 但都係用咗百幾元,都算好底買.

其中最貴係呢啲有顏色嘅木公仔裝飾,要成$8一個.

最底就係呢5條拉錬,$3有5條,真係平到笑.

仲有呢包花鈕,一"箕"買$16,有成14X粒,7-8種顏色,平均一毫子多啲,我一個人用唔哂,諗住上堂時,讓啲俾同學仔.

自製金磚...蛋糕&椰汁椰糖蒸雞蛋糕

好想整呢款蛋糕好耐,但諗起要落好多牛油,又有啲猶豫,結果決定做一次,今日將昨日已混合好麵糊由雪櫃攞出嚟回暖,再攪拌麵糊,令到麵糊均勻啲,再用湯匙放落錫紙兜裡面,放入焗爐焗約15分鐘就攪掂嘞.

撕去紙兜就食得,真係好好食,外皮脆而裡面軟熟.

呢個金磚蛋糕本來想整俾阿媽食,但又驚佢嫌外皮硬唔鍾意食,決定再蒸個椰汁椰糖雞蛋糕俾佢,用椰汁加椰糖會添加香味,仲可以去咗雞蛋腥味,我諗呢個會啱佢食多啲.

芒果慕士蛋糕

今日下晝會同一對新婚舊同事食晏,所以準備咗呢個簡簡單單芒果慕士蛋糕祝賀佢哋,百年好合,永結同心,但可惜呂宋芒已過造,水仙芒又唔夠香味,結果今次芒果比較酸,要加多啲糖先可以中和酸味.

晚裝手挽口金包

呢個口金包係上堂學嘅,但同導師買呢塊布好披口,一路做一路甩線,真係好擔心子口位都甩哂無剩,加上我應該唔會用,祗係用作交功課,所以內袋拉錬上得唔好都費事拆.求其縫埋就算.

因為用普通裡布,所以入面唔係好見得人.

裡面有兩個大,細袋,同埋拉錬袋,不過車得麻麻,我多數唔會用,祗係留作紀念就算.

健康全麥土司

天氣炎熱,最適合做麵包,但亦因為咁,無心機做野,所以見有全麥粉,就簡簡單單焗咗呢個土司.

今次用中種法,早上打好中種放係雪櫃,下晝攞麵團出嚟加埋其餘材料打至起薄膜,就發酵,最後焗好出爐喇.

甩模後未算太頂角,但已經算四正.

過咗一晚再切塊,麵包仍然軟熟.

第一次打蜜糖皂

已經上咗成6-7堂,而家先開始第一次自己打皂,其實都好驚會失敗,幸好第3日剪開紙盒都算成功,祗係切皂唔得平滑,仲要等多兩個禮拜先可以用呀,真係等到頸都長埋,如果好用都會繼續,但真係打到手軟,又無人幫,又無用機打,全程人手,加上計多咗減鹼量, 結果足足打咗成40分鐘,打到索哂氣.

健康南瓜仁南瓜方包

好耐都未做過呢款包喇,今次仲加埋南瓜仁添,可惜南瓜茸水份太多,結果麵團非常黏手,完全唔可以用手搓,引致未能充份排氣,所以麵包氣孔粗大咗,因為用低溫中種發酵,所以仍然好軟熟/

一年一度又嚟包粽

今年已經係第3年包粽,回想第一年嘅慘痛失敗經驗,真係印象深刻,今年要提早啲包粽,因為要遷就同朋友聚會時送俾佢, 但包粽預備工夫真係幾多,包括要浸/烚粽葉,浸/蒸江瑤柱,冬菇,栗子乾,又要浸糯米,綠豆,再用油鹽撈勻,仲有剝咸蛋攞咸蛋黃,醃五香鹹肉,一大堆工夫要做,如果唔係奄尖大少鍾意食,我肯定唔會包.

講完咁多費話,開工包粽嚕....,呢度係其中一部份,因為要練習包粽方法,所以有兩種唔同包法,有4角&5角形,內容一樣,不過奄尖大少怕膽固醇,所以佢食個啲就無咸蛋黃,而我剛巧相反,仲要落全隻,先覺得好食.

包完後烚4個鐘,再焗係煲內一晚,先攞出嚟隔去水份.兩斤糯米,一斤綠豆,總共可以包到21隻,一半送俾朋友,一半留番俾自己,食唔哂嘅粽要放係雪櫃冰格,留待要食時先解凍,或者放入滾水中原隻浸熱就得架喇.

呢隻係5角形粽子,下面係4角形,雖然包工有進步,但水草繩紮得唔夠實淨,加埋個啲粽葉係舊年用剩,數個夠包粽,咪諗住唔駛再買新粽葉,點知經過一年後,粽葉又乾又脆,非常容易裂開,差啲唔夠包哂所有粽,真係一步一驚心.

好嘞,終於解開粽葉試食喇.

睇吓餡料幾豐富,包括有冬菇,栗子,江瑤柱,五香鹹肉,咸蛋黃,食落糯米,綠豆夠火路,所以好軟滑,祗係味道比較淡啲,但同街外買嘅粽比較,真係好食好多,雖然幾辛苦,但都值得嘅.