兩個傻婆深圳半日遊

我已經好耐未去過深圳,未搭過深圳地鐵,從未踏足過東門,係咪大鄉里呢?主要因為我唔係好鐘意按摩,而韓劇/日劇又可以係網上download來睇,而且成日聽講東門好雜,朋友甚至話去廁所會俾人拉去割咗個腎,非常恐怖,但今次同以前舊同事,佢同我一樣辭咗份工,變成無聊人,大家有伴,就咁相約話去深圳行吓,好過出九龍,我哋都係新界友,佢之前已經講明唔識路,叫我自己搵定地圖同交通資料,所以我已經做好準備.

好啦今朝相約係上水站,然後再經羅湖去深圳,今日係閒日,所以都好暢順,大約15分鐘已經過咗關,跟住係羅湖商業城附近搵到去東門巴士站,一人2元人民幣車費,我哋搭咗架17路車,約7個站就落車到咗東門,行咗約3-4分鐘已經搵到咗我第一個目的地,就係聞名已久嘅"廚安居",立即衝上4樓烘焙用品部,其實呢年幾我係香港已經買得7788,但估唔到埋單都買咗成225人民幣,仲已經之前問朋友借定會員卡,如果唔係就唔止呢個價錢.

呢堆就係我嘅戰利品,包括有藍罐曲奇模(4個),donut模,唧花嘴一盒,朱古力括板一套,5個圓小蛋糕模,5個熱狗包模,一盒兩個刮忌廉蛋糕梳,調味不鏽鋼樽,超底嘅一次用唧花膠袋(100個),同muffin杯(50個),檸檬刮,不沾膠布,3個4吋戚風蛋糕模,係咪買多咗啲呢?

跟住過番天橋去東門步行街,準備搭地鐵去下一站,我唸住好容易搵,點知氹氹轉咗好耐都搵唔到老街站A入口,我個朋友朦查查,佢話每次嚟都係跟住朋友,所以無乜認路,最後終於靠佢依稀記憶搵到個間荔灣茶餐廳隔無幾遠見到"地鈇"指示入口,先去到下一站.

下一站係準備去萬象城食晏再去深圳書城,今次一落車,佢就話曾經嚟過,叫我沿住呢條走廊直行.

面

又俾佢叻番一次,點知上到路面,兩隻野又迷失方向,終於再傻吓傻吓搵到電梯上3樓,我哋準備去個間"留園飯店"食上海野,因為係網上網友介紹話幾好,行到入商場又搵唔到,行咗一大個圈起碼成10分鐘,出番商場電梯,原來係電梯後面,根本唔駛行入商埸裡面,真係激死.

好啦,終於可以食晏,兩個人叫咗冷盤芥末鴨掌,生煎鍋貼(5隻),小籠包(3隻),蜜餞火方(2件),棗泥拉糕(3件),味道都幾好,但都好細碟,埋單154人民幣,唔算便宜,不過好食就算.

我用手機影,燈光又暗,所以唔清楚,

好嘞,食飽後又出發去深圳書城,但係路面見唔到喎,於是走去問商場工作人員再行番上地面轉個灣先見到,上咗4樓,睇吓啲烹調書,好樣啲嘅書都唔平,一本要成68元,如果係香港書局有8折都差唔多,結果勉勉強強揀咗呢兩本. 個帆布袋係去完書城後,去番萬象城地面個層,朋友帶我去一間類似City Sup'r嘅超級市場,佢話呢度啲麵包新鮮出爐,好好食要買番香港,我就買咗呢個購物袋,睇吓鐘都下午4點幾,要番歸準備煮晚飯lu..

我哋今次試吓由福田走,搭地鐵去到會展中心站轉4號線到福田口岸,指示都好清晰,離境大堂無乜人,我就順便登記埋快速出入境,咁下次去就方便啲,跟住就要行一條長長通道,橫跨深圳河,過番來香港落馬州呢面.又係小貓3兩丁,唔駛幾分鐘已經攪掂入境.

朋友住新界東,所以佢搭火車,而我就向後直行轉灣落地下搭B1巴士番元朗再轉車番屋企.

我計過連等車由深圳番到屋企都係約一個鐘度,仲近過出香港,同出九龍差唔多時間,總結今次行程,交通都幾方便,但其實無論食野同買野,深圳個面價錢都唔算平,所以都唔明咁多香港人成日都去深圳,我自己就偶然一次去當換吓埸地,但就唔會成日去囉.

第一次焗玉桂蘋果批

今朝一起身,見出面落雨,而且越落越密,無得出去跑步,食完早餐,無所事事,見到枱面有一個蘋果食剩,於是決定焗蘋果批.

雖然係堂上已見到Miss做過幾次,但因為太多牛油,所以從來未試過自己做.

首先將冰凍牛油切粒同麵粉,糖霜用切刀切割混合,再用手指尖搓成砂粒狀,避免牛油溶化,再打入雞蛋液混合,呢個時候最好將麵團放入保鮮袋內用手輕力搓成團狀,千祈唔好大力搓至起筋,再用碌麵棍碌到約3mm厚圓形,放入雪格冷藏約20分鐘.

跟住準備玉桂蘋果餡,材料有蘋果去皮切片或粗粒,砂糖,焗香合桃碎,提子乾,玉桂粉,麵包糠用來索乾蘋果汁.

用煲將蘋果片或粒煮至乾水,加入糖煮溶,再放入提子乾,合桃碎,最後加埋麵包糠,熄火攤凍備用,我加咗Rum酒,等佢有啲香味.

將雪硬嘅批皮攞出來,錫紙墊底,灑粉沬將批皮放上面,再灑粉,保鮮紙蓋面,用棍碌到大過批模嘅面積,將成塊批皮蓋於模內壓實邊沿同底部,而將多餘批皮撕掉,再用叉叉洞係底部,避免焗時膨脹,但要掃上蛋汁防漏.

然後均勻鋪上蘋果餡,將頭先多餘批皮碌成一塊,用刀切割成2-3mm條狀,黏係批面,掃上蛋汁,就可以放入焗爐焗啦.

焗咗約40分鐘就可以出爐.攤凍一陣就甩模.

攤凍切開後,食落批皮幾鬆化,蘋果餡甜度剛好,今次自己覺得唔錯,但我唔會獨食嘅,有3/4應該攞去派街坊,另外多餘批皮就焗咗呢幾隻曲奇餅,咁就功德完滿嘞.

今日下午茶點-香蕉蜜糖雪芳蛋糕

今日下晝要將雪櫃內嘅蛋白&蛋黃消滅,上網搵到呢個香蕉蜜糖蛋糕食譜,改良材料份量後就開工.

主角梅花點香蕉被前面個蛋黃兜擋住咗,所以見唔到.

首先將香蕉去皮,用叉壓爛成蓉,將蛋黃加糖打至變淡黃色,加入香蕉蓉,蜜糖,攪勻後再加入芥花籽油攪拌均勻.

另外打起蛋白加糖,直至硬身,攞1/3加入上述蛋黃漿內,並加入一半過篩麵粉+粟粉,重複至蛋白同麵粉加完為止,儘快攪至無粉粒,同埋蛋白完全混合後就立刻倒入雪芳模中,用力係枱面摔幾下,將大氣泡消除,跟住放入焗爐焗.

焗到1/3時間見糕面轉色就蓋上錫紙係糕面,約40分鐘後就可以出爐.

今次糕面升得太高,黏住錫紙,所以個樣肉酸啲.

攤凍後用雪芳刀界開模邊,將蛋糕甩模.

切開試食後都幾鬆軟,不過稍為濕潤咗啲,下次要減蜜糖先得.

洋蔥火腿香草方包-中種法

今日焗咗呢款咸方包做早餐.

首先將約70%筋粉,乾酵母,水搓勻成團發酵約1.5-2個鐘成中種麵團.

之後再餘下30%筋粉,水,奶粉,鹽,糖,少量酵母一齊打成團,再將中種麵團撕成小塊放入一齊攪拌成團,後加牛油,打至有薄膜,就可以作第一次發酵,排氣,再發酵約20分鐘,將麵團拍實,用棍碌成長方形,鋪上混有黑椒已焗乾身洋蔥粒同火腿粒.

再捲實放入麵包模中作最後發酵至8-9成滿,將麵包蓋封頂,放入焗爐焗至金黃色.

今次終於頂角啦,好開心,攤凍後切開試食,好柔軟同好有香草味,用中種法都唔錯幾好.

柑桔蜜小蛋糕

今日利用之前自製嘅糖柑桔焗咗幾個小蛋糕送俾朋友.

材料有全蛋,柑桔蜜,將部份糖柑桔切碎,一部份完整作面頭裝飾,奶,芥花籽油,過篩麵粉同泡打粉少許.

將全蛋同柑桔蜜攪拌均勻,加入油同奶,再加入過篩麵粉,泡打粉,最後拌入糖柑桔碎,將麵糊放入蛋糕模內,將一顆糖柑桔放在面就可以焗啦.

經過約30分鐘左右就可以出爐,試食後有濃郁柑桔味又唔甜,但因為唔係落牛油,所以唔夠香,都算幾好,下次可以再encore.

越南尋親之旅

今個星期一同阿媽去越南開始尋親之旅,其實我係懷著戰戰兢兢心情上路,因為大家從未見過面,要去到機場舉牌相認,又唔知人哋會唔會覺得我哋冒昧,好彩見面後發覺佢哋非常熱情,,大家都好高興,而相處幾日發現搵番以前中國人個種濃厚人情味同埋尊敬長輩嘅傳統,本來打算同阿媽住酒店,但點知到埗後,堂姐極力邀請我哋去佢屋企住,將唯一有冷氣房間讓俾我哋瞓,而佢同個女就去另外一層無冷氣房間,我覺得好感動之餘亦唔好意思.

係網上搵到最平宜嘅越南航空機票,就係坐呢架機不過唔係直達入境大堂,而係需要坐接駁巴士.

由於呢個時間得我哋一班機到,所以輸送帶都係空空如也,不到10分鐘辨理完入境手續,行李已到,唔駛等,而天氣等於香港夏天,不過大部份地方都無冷氣,除咗高級酒店&餐廳.

跟住去到堂大哥鄉村屋企,又受到佢熱情款待,雖然不是甚麼佳餚,但全部都係自家出品,天然無添加,包括有走地雞,新鮮疏菜,豬肉,魚等,週圍嘅田園鄉村環境令我不禁想起昔日童年住嘅地方都好類似,雖然要乘坐3個鐘以上車程,但亦非常值得,下次要去住長啲時間,而鄉村好多路已鋪上柏油,非常平坦同清潔,不再塵土非揚,真係出乎我想像.

豐富嘅一餐午飯,計有無油薄皮自家養走地雞配新鮮沙薑,豬雜炒荷芹,蕃茄魚,冬菇炆豬肉,新鮮生菜,其實仲有清補涼煲豬肉湯等.

走地雞隨地走

自家養3頭豬

堂大哥嘅屋企,四面通風,非常涼爽.

越南人家家必備吊床,瞓係上面真係好寫意,好容易瞓著.

估唔估到係乜東東?答案係下一張.

就係新鮮腰果,將表面厚皮撕去,焗乾就係腰果嘞.

睇吓我似唔似游擊隊員?其實因為坐電單車,怕塵土飛揚,要戴上口罩同頭盔.

好多芒果嘅樹,垂手可摘,唔駛爬樹,可惜未夠熟唔可以摘來食,

大樹菠蘿掛係樹上

 講番係胡志明市,交通真係非常恐怖,四圍都係電單車,完全唔識或無可能過馬路,交通燈極少,就算有都唔會遵守,橫衝直撞,相當驚險,由於逗留日子短,加上阿媽唔行得,祗係去咗幾個地標,天氣又好熱,成日出汗,不停飲水,慳番唔駛去廁所,早餐就有3日都係係街市檔口食湯河粉,烏繩四圍飛,不停要趕,但味道都唔錯,雖然盡量飲樽裝蒸餾水,但後來忍唔住都飲加冰汽水,好彩都無肚疴,佢哋又好客,不停輪流請飲茶,食晚飯,雖然中菜味道普通,但親情搭救.

胡志明市清晨街頭

郵政總局大門好優雅古典,係呢度買咗張postcard寄番香港俾自己.

前總統府無乜特別

總統府內會議室

雙塔天主教堂,可惜過咗參觀時間,要等到下晝3點先再開放.

最後臨走時,大家又爭相送禮,個啲手信多到嚇死人,攪到前一晚不停計算是否超重,結果我將所有衣服鞋等放係手提旅行袋,而空出成個行李喼先勉強將所有手信帶走,而且番屋企更要逐步將喼拉上四樓.

手信大堆頭,左邊係10包雞肉乾河粉,中間紅花紙係共5KG紮肉,左上角有1KG焗腰果連皮,中間上面係大樹菠蘿,雜果同芋頭乾,右上角有沙虫乾0.5KG,最右邊係10包牛肉乾河粉,而前面正中共6袋4黑2白胡椒粒,係自家種,仲有0.5KG蝦米係阿媽到,遲啲先拎番.我阿媽亦都有相同份量嘅手信,真係嚇死人囉,今日切開紮肉好好食,而河粉都好軟滑,連奄尖大少都話好味,食唔停口.

總括而言雖然短短5日,來去怱怱,但係感受到好耐都未曾有過嘅濃厚人情味同親情,好開心有今次旅程同親人見面相認.我諗下次有機會會再去探訪佢哋.