試新玩具-DIY 花生醬

近排買咗個新直立手控式攪拌機,主要因為舊乾磨機玻璃兜俾我跌落地打爛咗,而且磨得唔夠粉碎,經過一輪資料搜集後,終於買咗呢部有600W嘅新機嘞.

今次首先試吓整花生醬,將生花生米炒香去衣,放入機內開掣攪,嘩! 好快20-30秒已經好碎,再攪多陣已成漿狀,仲出埋油,基本上都唔駛再落花生油,加啲蜜糖,真係好好味,係攪拌過程中,已經聞到好香花生味,以後再試吓其他配件先.

一人午餐-改良版菜飯

今日天陰落毛毛雨,真係唔想出街,於是利用屋企有限資源整咗呢個改良版菜飯.

材料有白菜絲,臘腸切粒,浸軟蝦米切粒,冷飯一碗.

首先將臘腸粒爆香,利用爆出嚟嘅油爆蝦米粒,再落薑絲,白菜絲,灑酒,煮一陣,落埋冷飯兜勻,加少少浸蝦米水,將冷飯炒開,最後落麻油,豉油調味就食得嚕.....係咪好容易呢?都幾好味架,如果米飯再硬身啲就好嘞.

環亞佳餚精選課程-第九課-照燒銀鱈魚&檳城喇沙

昨日學嘅兩款菜色,分別有日式照燒銀鱈魚,同埋馬來西亞檳城喇沙.

一開始首先煮咗照燒汁先,因為要煮成30分鐘先可以用,將薑,蔥段,日本醬油,清酒,味醂,糖加水慢火煮至剩1/3左右,加入少許生粉水攪勻.

銀鱈魚解凍,抹割水份,用煎pan慢火煎至金黃色,再倒入煮好照燒汁,慢火煮一陣就可以上碟.

照燒汁好好味,其實可以用呢個汁整串燒雞柳,煮定多啲備用,用途都好廣泛架.

至於檳城喇沙,香料比較多,將蒜頭,紅蔥頭,香芧打成蓉備用,將蝦去頭,殼加外層硬香芧,芫茜頭滾湯作上湯之用,椰菜切絲同芽菜一齊熨熟隔水,本來應該用一半米粉,一半油麵,Miss改咗用乾裸條,用冷水浸10分鐘,放落滾水中略為滾2-3分鐘撈起,放入冰水中過冷河備用.

當一切準備就緒後,就開鑊下油爆香香料蓉,辣椒膏,羅望子膏(亦即叫亞參或酸子),粗粒花生醬,芫茜,檸檬葉,紅辣椒粒,將蝦上湯倒入煮滾後再加椰漿,調味料.

羅望子膏包裝

蝦頭漿加入湯內更加好味

煮近蝦上湯

將鮮蝦放入滾湯中焯熟,並將已經焯熟椰菜絲,芽菜,粉條回鑊煮至滾起就可以食嚕....

都相當好味,但如果自己整要減辣.

士都倫麵包

好快又臨近聖誕節,所以今日做咗呢款麵包應吓節,不過雜果皮粒,提子乾就要預早用Rum酒/拔蘭地酒浸定,我就浸咗有成10日.

除咗用酒浸雜果皮粒,提子乾外,仲有杏仁片,少量香粉(丁香,玉桂,豆寇粉)加埋發咗3個鐘嘅液體酵種,而麵粉係一半高筋,一半低筋粉.

呢兩舊係發好嘅麵團.

做型後準備作最後發酵.

焗好出爐,立即搽上溶牛油.

攤涼後灑上防潮糖霜.

切開試食覺得唔太甜,OK啦,但奄尖大少就唔like,因為佢唔鍾意食提子乾,香料麵包,聽講要隔1-2日食,等酒味發揮出嚟,味道會香啲喎.

黃金饅頭&蒸雞蛋糕

饅頭內當然唔會有黃金,祗不過用嚟形容金黃色蕃薯蓉,做咗兩次芝麻饅頭,所以今次改一改餡料,而發酵方法仍然用兩次發酵,類似中種,將70%麵粉,水,酵母發酵一個鐘,再加其餘粉,糖,少許油搓至麵團光滑,休息7-8分鐘,用棍來回捍壓,摺疊重複數次,鋪上蕃薯蓉.

將麵團捲成圓柱體,切成等份,作最後發酵.

蒸咗18分鐘左右就蒸熟,再揭開蓋小小約5分鐘,讓蒸汽散走,就可以完全開蓋.

因為無用壓麵機壓麵皮,所以表面仍然有氣孔,凹凸不平,但都無影響味道,趁熱食好鬆軟.

但蒸雞蛋糕就好失敗,呢個係跟網友教祗係用雞蛋加糖打發後,加入過篩麵粉,泡打粉,攪滑後,再分幾次加奶,慢慢攪勻,最後加少少油撈勻就蒸,但...點知蒸完後,完全死死實實,一啲都唔發,我懷疑泡打粉失效有關.

但又應承咗蒸俾阿媽食,於是祗好用番第一次方法,搬出電動打蛋機,將蛋加糖打至淡色加企身,再加奶,麵粉,用另一樽泡打粉,倒入模中再蒸過,今次好啲,但氣孔相當大,下次要再努力改良至得.

聖誕西甜品課-第九課-班戟伴熱橙疏乎里

上堂差唔多臨近尾聲,今日第九堂學嘅係一個飯後甜品,以前自己都好鍾意食.

首先一開始準備班戟漿,主要都係雞蛋加糖攪溶,慢慢加過篩麵粉,少少鹽,奶攪滑,最後加入坐溶牛油,置室溫約30分鐘備用.

跟住就將橙表皮刨皮切幼絲,祗係要橙色個層,唔好刨埋白色,否則會苦澀,用滾水淥一陣去苦澀味,再放入煮溶糖水中,攤涼後加入少許橙酒,可以隔日做定,咁橙絲會入味啲,而橙肉去橙衣,要淨肉作裝飾.

仲要煮橙醬汁,將橙搾汁隔渣,用pan煮溶牛油加糖煮至微焦糖色,加入橙汁煮至水份收乾一半,熄火待涼後加入少許橙酒,呢個汁亦可以隔日煮定,唔駛即日做咁怱忙.

睇吓就係呢幾樣橙xxx嘞...

一切準備就緒後就可以開工煎班戟,用抹手紙掃一層油係pan四周,用湯殼倒半殼落pan中,要即時搖勻班戟漿,平均成薄薄一層,用中火煎至班戟起泡,週邊微黃,就可以翻轉煎另一邊,因為班戟薄,翻時要快手同小心.

呢塊係我煎.

要將班戟對半摺起成半月形,再對摺多一次成為三角形.

將橙漿汁倒在碟底,放上班戟,再灑上橙絲加橙肉,就完成班戟伴熱橙部份.

而疏乎里首先就要將蛋黃,水加糖坐熱水打至杰身,加入橙酒,蛋白則加入糖,檸檬汁打至企身加入蛋黃漿內拌勻,疏乎里杯要掃油灑糖,再將疏乎里漿倒至平頂,面灑上糖霜入爐爐焗7-8分鐘就可以攞出嚟,倒置係橙皮班戟上就完成嘞.

焗起疏乎里.

Miss擺設個碟.

呢碟係我嘅,至於味道我話當然好食啦,用咗唔駛5分鐘已經清碟,但呢款甜品,準備工夫都幾多,如果自己整,要分開兩日做至得.

BB女背心+帽

舊同事生咗個女,所以我織咗呢套背心+帽恭喜佢,我自己覺得DIY好似俾人感覺有誠意啲,不過唔知收禮物嘅人係咪都係咁諗?

油浸半乾蕃茄包

係食譜書見到呢款麵包好吸引,加埋我老友好恨食蕃茄麵包,於是買齊材料就開工.

今次材料比較多,有油浸半乾蕃茄切粒,罐裝去皮蕃茄,蕃茄膏,而油就用番浸半乾蕃茄嘅芥花籽油,加埋發過夜低溫中種.

但呢款包好黏手,原本想跟書做型,結果放棄,祗係搓好後勉強捲好就入模作最後發酵,蓋上模蓋就入爐焗.

點知焗完出爐,反轉麵包係架上時,因為太鬆軟,壓扁咗表皮,唔得靚仔添.

好彩攤凍後切開,麵包組織都幾鬆軟,隱約仍然見到油浸半乾蕃茄粒,味道嘛...微甜帶酸,不過唔太感覺有蕃茄味,雖然加齊咁多蕃茄材料,一條留番自己做早餐,另外一條就送俾我老友食,叫佢俾啲意見我.

環亞佳餚精選課程-第八課-玉米薄餅&瑪沙拉羊肉

今日上堂木學嘅係印度式瑪沙拉羊肉&玉米薄餅,煮法唔太難,不過要買齊所有香料&玉米粉,尤其係有隻叫瑪沙拉香料,一定要去印度商店或City S'upr先買到.

首先睇吓香料&玉米粉先.

玉米薄餅就好簡單,祗係將玉米粉,低筋粉,水一齊搓勻,鬆弛一陣,將麵團分成等份,搓圓壓扁成圓形,用平底鑊慢火烘至兩邊熟就可以食,其實都好健康,無油,無糖,不過較為煙韌,如果凍咗會變硬要煎番熱食,或用香草,蒜蓉加入麵團搓勻用炸方法變成小食.

而瑪沙拉羊肉,就要用紅蔥頭碎,蒜蓉起鑊,炒香洋蔥粒,加入混合香料,羊肉粒,後加去皮蕃茄粒,乳酪一齊煮約45分鐘左右,最後加入椰漿,灑上芫茜就完成.

不過唔好問我好唔好食?因為我唔食羊,怕佢羶味,祗係帶咗少許番屋企俾奄尖大少試味.

芝麻麥饅頭

由於上個禮拜奄尖大少出乎意料捧場芝麻饅頭,所以今個星期再encore,不過都有些少改變,就係加咗全麥粉,多啲纖維,減麻蓉,用咗中種發酵方法,令饅頭鬆軟啲.

捲好切成等份作最後發酵.

蒸好後表皮出現豆皮,可能蒸汽溫度仍然較高,不過饅頭真係比一次直接法鬆軟好多,除咗表面唔多靚仔外,好食過上次芝麻饅頭.

聖誕西點甜品班-第八課-聖誕士都倫麵包

臨近聖誕節,所以今堂Miss教嘅都係關於聖誕嘅食品,就係士都倫麵包.

首先要做定一份液態中種,主要係高筋粉,水,酵母混合完,靜置約2-3個鐘,再將其餘低粉,蛋,牛油,酒淹過乾果皮,杏仁片,玉桂粉,豆寇粉,丁香粉混合搓至有薄膜,作第一次發酵,然後排氣分割,再靜置約10分鐘,整形.

放入有暖溫焗爐作最後發酵至3倍大,就可以放入焗爐焗,由於我哋做嘅包係迷你版,所以焗約20分鐘就可以出爐,要即刻係麵包表搽上溶牛油,再灑上高溫糖霜,睇食譜書話等2-3日後食先好味,主要俾酒味揮發出嚟喎,我試食同學仔個份,覺得唔太甜,都幾好味,我聖誕節會做呢個麵包好過焗蛋糕,無咁肥膩呀嘛.