特色蛋糕甜品班-第四課-生薑芝士蛋糕&藍莓提子乾鬆餅

今日學呢兩款蛋糕,其實生薑芝士蛋糕上期已學過,因為Miss重複放入課程,佢應承加料補番重複嘅幾樣蛋糕,

起初以為鬆餅好簡單,原來都有竅妙,首先牛油加糖一定要打到好鬆軟,雞蛋要用分蛋法,將蛋白打至彎曲狀,再加入麵糊內撈勻,最好用手撈,跟住分開一半加入新鮮開邊藍莓,另一半加入提子乾.

將麵糊盛入已放紙兜模內.

放入焗爐焗20分鐘左右,就可以出爐.

攤凍甩模就攪掂,食落真係好鬆軟,幾好味.我會試吓整.

另外生薑芝士蛋糕今次改用手指餅蛋糕做底,淡忌廉加薑汁糖水打至軟忌廉狀備用,忌廉芝士加糖打至軟滑,再加生薑汁,糖薑碎,坐熱溶解魚膠液撈勻後,將打起淡忌廉加入,最後加埋打起蛋白,再倒入已墊好手指餅蛋糕模內雪凍就完成.

韓式炸醬麵

成日睇韓劇,見到佢哋食炸醬麵好似好好味咁,聽講係尖沙咀韓式餐廳食要$50幾蚊一碗,偶然係網上發現韓式炸醬麵食譜,見到都唔難整,一於DIY試吓整先.

材料包括有豬肉碎,洋蔥,紅蘿蔔,椰菜切粒/片,最緊要有韓式黑麵豉

首先用油炒熟醃過豬肉碎盛起,再爆香麵豉醬,要灑酒,跟住炒香洋蔥至軟身,加埋椰菜,紅蘿蔔粒,加入麵豉醬,將豬肉碎回鑊,加水煮至紅蘿蔔粒軟身,水份開始杰身,加糖,用生粉或粟粉打獻就可以熄火嘞.

將白麵條淥熟,過冷河,放係碟上,加青瓜絲,蛋絲,炸醬就食得.

味道唔錯,不過原來麵豉醬都幾辣,好彩煮到中途試味發現,即刻倒咗一半汁,再加番一半水溝稀,先至可以食得入口咋.

杏仁吉士辮包-全低溫

今次我又試新發酵方法,就係打好麵團至有薄膜後,放入已掃油保鮮袋,將裡面空氣迫出,索緊袋口,放入雪櫃24小時,主要係用低溫等麵團慢慢發酵.

今朝將麵團由雪櫃攞出嚟,放約1個鐘解凍,分割,滾圓,靜置約30分鐘,包入吉士餡.

搓成圓柱形.

擯成3辮狀.

放係焗盤作最後發酵至2.5-3倍,搽上蛋汁,灑上杏仁片,就可以放入焗爐焗.

焗咗20分鐘就可以出爐啦.

切開試食同17小時中種唔同,麵包雖然都係鬆軟,但比較煙韌,各有各好.

紫心蕃薯奶黃包

好耐未焗過蕃薯包,所以今日就焗咗呢款包.

仍然繼續用低溫中種法,將已蒸熟壓爛紫心蕃薯茸加埋同主麵團,中種一齊搓勻至有薄膜.

睇吓顏色真係好靚

發酵完後,排氣,分割成8等份,滾圓,靜置約20分鐘,包入預先煮好凝固奶黃餡,放入戚風模內作最後發酵.

當發酵至8-9成滿就可以入爐焗.

甩模後中間煙囪位置有啲黏實,旁邊個包有些裂開.

切開試食,仍然保持一貫鬆軟,奶黃餡減咗糖,唔...好好食.

特色蛋糕甜品班-第三課-鳥結糖巴菲&白之戀人曲奇

今日上堂學嘅係鳥結糖巴菲&白之戀人曲奇,呢兩款甜品&曲奇.

鳥結糖巴菲,首先要焗香杏仁片,中途要翻吓佢,否則會燶咗變苦,然後煮糖至少130度C或以上,見糖開始變焦黃色,就要即刻將牛油溶入去,快手倒入杏仁片撈勻,倒落已墊錫紙盤內,用牛油紙鋪面,再用棍碌薄.

冷卻後再壓碎,繼續再準備巴菲,主要用蛋黃加糖坐熱水打起至83度C,再加入杏仁酒同扑碎杏仁糖,最後混入打起淡忌廉,倒入模中,放入冰格至雪硬身,切片狀就食得.由於要頗長時間雪硬,所以要下星期上堂先可以食.

太多人迫住,所以影得好差,前面長形奶白色個條就係鳥結糖巴菲漿

後補:

等咗兩個禮拜後,終於有得食嘞,嘩...食落第一啖後,竟然唔停得口,尤其是裡面嘅杏仁脆糖,好好味,雖然知道有蛋黃,食咗會好肥,都唔理住,隔離同學仔唔食,讓埋俾我,真係發達嚕...

白之戀人曲奇,最重要將牛油,糖粉打至鬆軟,變成奶白色,然後分幾次加入蛋白打勻後,加入已篩麵粉,用免黏布/牛油紙鋪在枱上,擺上曲奇軟模,將麵糊塗在模上,再用刮去刮平麵糊,拿起軟模,放入焗盤,再入爐焗至金黃色.

將溶解白朱古力唧上餅乾面,用另一塊合埋,就完成啦.

食落餅乾好鬆脆,但稍甜,唔用白朱古力改用黑朱古力會好啲.

廢物利用-雜菜渣燒餅

今日榨完雜菜汁飲,諗起仲有日本燒餅粉,靈機一觸,廢物利用,於是就煎咗呢個燒餅做午餐.

首先將雜菜渣(西芹,青瓜,白玉苦瓜)混合燒餅粉.青綠色個啲就係雜菜渣已經變成茸.

再加水,雞蛋,鮮蝦粒撈勻成麵糊.

將麵糊倒落煎pan中用少許油慢火煎.

煎至燒餅邊硬身就番轉煎另一邊.

煎至熟透就鏟起上碟,加沙律醬同燒餅醬.

最後灑上紫菜絲同木魚片就食得嘞,因為雜菜渣有水份,所以燒餅比較軟身,但都好好味,而且多咗啲纖維,比較健康,都唔錯...

第一次去書展

香港書展雖然已舉辦咗20年,但我從來未去過,証明我唔係一個太鍾意睇書之人,當時由於要番工根本無時間去逛書展.

今日因為約咗朋友,但又未夠鐘,中間有兩個鐘度得閒,諗起今日係書展最後一日,於是就去趁吓墟,去到灣仔站落車,已經人頭湧湧,跟沿路指示行,同平時去會展嘅路唔同,屈上又屈落,行多咗好多路,好彩買票都唔駛排隊,因為朝早11點之前入場,所以祗係10蚊雞入場費咋.

入到會場有消淅指示,一面去一樓綜合會場,主要係香港書局同出版社,而三樓係台灣,大陸書籍. 我當然係去咗一樓先啦.

行到入去已經好多人,基本上所有書都有8折起碼,間唔中見到有6-7折,但唔算多,仲有啲$10一本,好多人圍係度睇,但唔算熱門嘅書籍,所以無買到.

大概行咗一圈後,見有時間上埋3樓睇吓,仍然係咁多人,但我唔係太鍾意睇簡體字,而且已經夠鐘要走,所以未行哂已經離開.

難得去一次,雖然平時係旺角樓上書店或馬健記都有8折,但都買咗呢堆書,總共用咗$230 幾蚊,平均約$4x左右一本,價錢普通唔算太貴.

香蕉合桃brownie

因為買得香蕉太多食唔切,已經起梅花點,加上朱古力就快到期,所以焗咗呢個蛋糕準備明日送俾朋友.

我用6吋正方形模焗.

因為怕黏實難甩模,所以係模邊四圍噴咗油,但甩模後四邊蛋糕硬咗,係咪唔應該噴油改為用紙圍邊先啱呢?

攤凍切件後用靚靚膠袋入好蛋糕就攪掂,試食後香蕉味好似唔太覺,下次可能要加多啲.

伯爵奶茶包-低溫中種

我好鍾意伯爵茶裡面佛手柑味,所以好耐已經想試吓做呢款麵包,結果今日開工嘞.

我用咗呢款茶包,將5包(10g)同奶一齊焗熱取汁. 另外剪開3包(6g)茶葉碎同中種,主麵團一齊搓勻.

打成呢個奶茶麵團.

發酵,排氣,分3等份,再靜置約20分鐘,放氣後捲成圓柱形,放入麵包模內作最後發酵至8-9成,搽上蛋汁就可以焗啦.

大概30分鐘度就可以出爐,雖然已鋪咗錫紙摭面,但旁邊仍有啲燶咗.

攤凍切開試食後,保持一貫中種麵包軟熟,但我嫌茶葉味稍淡,應該加多啲茶葉咁仲會好味啲.