聖誕西點甜品班-第一課-蛋白釀朱古力慕士

今日又開始去上新蛋糕甜品班,內容主要集中會教聖誕嘅蛋糕甜品,但由於未到聖誕,所以會學其他蛋糕甜品先,今次學呢款叫做蛋白釀朱古力慕士.

首先將蛋白加糖打起至7-8成彎勾狀,亦即馬令,然後用唧袋唧入銻/錫布甸杯內,約8-9成滿,焗盤底加約一半水,而面要用錫紙封好,放入預熱焗爐120度C焗約20分鐘.

出爐後將中間蛋白挖走,以便陣間釀入朱古力慕士餡.

至於朱古力慕士餡,要將一半淡忌廉煮熱,加入苦/黑朱古力溶解,另一半淡忌廉打起,再將頭先挖走蛋白馬令加入溶解朱古力液體內,再拌入打起淡忌廉,用唧袋唧入蛋白中,放入雪櫃雪凍.

跟住仲要準備雲尼拿汁,將新鮮雲尼拿條切開,括出種子,加入奶,糖,淡忌廉內煮熱,撈起雲尼拿豆夾唔要,熄火加入蛋黃,攪勻後再開慢火煮至杰身.

除此之外,仲要焗朱古力薄餅乾作裝飾之用,用淡牛油,糖,麵粉,唂咕粉,蛋白撈勻成粉漿,抹係膠模內,入焗爐焗4-5分鐘.

食時將雪凍布甸杯倒出蛋白朱古力慕士,底部糖水要隔走,將雲尼拿汁淋上碟旁,朱古力餅乾插係蛋白面作裝飾.

坦白講,呢個蛋白馬令超甜,我諗我自己唔會整,至多都係整朱古力慕士.

香蜜榛子粗粒花生醬

我好鍾意用花生醬搽麵包,但係出面街賣嘅多數都落反式脂肪令花生醬唔會油醬分離,係網友蜜蜜個Blog見到原來自己都可以自製花生醬,而且唔難整,咁就一於試吓整先.

首先將生花生米用白鑊慢火炒香.

然後去衣

放入攪拌機將花生打成蓉,但我因為用部細攪拌機打,所以祗能變成粗粒,然後加榛子粉,花生油,蜜糖,再攪勻成糊狀.

將花生醬放番入舊花生醬樽內,再放入雪櫃冷藏,因為無添加防腐劑,反式脂肪,所以唔可以室溫擺放架,試味後有好香濃花生味,又唔太甜,真係Very Good呀!

環亞佳餚精選課程-第一課-青豆茸湯&意大利香草包

今日開始上新一期烹飪課,第一堂教嘅係青豆茸湯&意大利香草包,其實香草包以前學整麵包時已學過,不過唔緊要啦,溫故知新嘛.

Miss有加低筋粉,同之前學嘅有啲唔同,主要將高筋粉,雜香草,蒜粉,黑椒粉,鹽,橄欖油,水一齊搓至起筋膜,經過第1&2次發酵後,放麵團係焗盤內,搽上橄欖油係麵團面,就可以放入焗爐焗.焗大約15分鐘左右,就可以出爐再搽多一次橄欖油,灑埋海鹽係麵包面,切開就食得,由於新鮮出爐,皮仍然好脆,好好食.

麵團係焗爐發酵之中.

焗好出爐

青豆茸湯就要將洋蔥,西芹,煙肉切粒,青豆&無殼急凍蠶豆就洗乾淨備用,首先將煙肉粒炒至出油,加入洋蔥,西芹粒炒至軟身,加入青豆,蠶豆,再加雞湯,水,香葉煮至豆淋身後,倒入盛有青蔥大碗中,加入薄荷葉,放入攪拌機中打成茸. 如果想滑就隔去渣,否則直接倒入鑊中加熱,再加淡忌廉,調味,攪勻就可以飲,不過我覺得煙肉加雞湯,味道好咸.如果想杰身啲可以加入薯蓉.

係鑊中煮近青豆茸湯.

煮好飲得加埋用香草包送湯唔錯,食到好飽.

平頂方角楓糖栗子方包-低溫中種

我主要想消滅之前剩低嘅栗子蓉,&楓糖漿,仍然用低溫中種法,當發酵完計算過重量,應該可以焗成起角方包,所以就將麵團放入方包模內.

發到9成左右,就合上模蓋放入焗爐.

焗好拉開模蓋,見到麵包已經平頂.

甩模後果然見到麵包邊起角,都幾開心,因為唔係次次都做到架.

`

攤凍切開,仍然保持低溫中種一貫鬆軟,其實自從用咗新鮮酵母之後,好似麵包發酵比較穩定,每次麵包組織都發得唔錯.

試浸醉雞

奄尖大少都幾鍾意食醉雞,咁就等我試吓整,滿足吓佢口腹啦.

首先買咗隻新鮮嘉美雞番嚟,斬開幾舊,洗淨索乾水,用鹽,酒醃一陣,然後用蔥墊碟底,將雞塊鋪係上面,再將薑片放係雞塊中間,蒸熟,立即將雞塊放入冰水中冷凍約15分鐘.

而浸醉雞料包括有香糟露,裡面已經有花彫酒,鹽,其他香料,為咗加強酒味,用埋詔興花彫酒,魚露等,混合後要加糖,加水開勻試味.

將冷卻嘅雞塊放入醉雞酒液內浸,要放入雪櫃浸咗一日,間中要翻吓佢,咁先會均勻入味.

食嘅時候由雪櫃攞出嚟斬件,但可惜....我唔食得,因為我對酒精敏感,我祗係試咗食一舊雞膶,同雞腳,唔夠2個鐘,手腕,肚臍附近起紅點,又痕又癢,要立刻搽止痕藥膏,所以奄尖大少一個人自己食哂加埋帶飯,我就無福消受,好彩佢都覺得味道唔錯.

焗叉燒

近日見到網友TCCOCO去學整叉燒,同我平時整嘅配方有啲唔同,今日就試吓跟佢嘅食譜,睇吓有乜唔同?

去街市豬肉檔買咗梅頭肉番嚟,洗淨抹乾後,落蒜片,紅蔥頭片,唔記得買芫荽,所以無落.

8

將醬料,香料粉,醬油,糖等混合後,撈勻梅頭肉,我醃咗4個鐘度.

將青蔥排在烤架上,掃一層油,再將醃好梅頭肉放係蔥面排好.

放入焗爐焗,每邊焗10分鐘,然後翻轉另一邊又焗10分鐘,搽上麥芽糖水,每邊再焗多10分鐘,出爐後立即搽多一次麥芽糖水.

攤凍切開,食落味道好味過我用開嘅食譜,可能加咗3種唔同香料粉,下次我都會再用呢個食譜.多謝網友TCCOCO嘅分享.

雜果醬包-湯種

今日用湯種做咗3款唔同餡料嘅包包.

有士多啤梨果醬

自家製黃梅果醬

包成圓形,搽完蛋汁後,係包面剪口,灑上花生碎.

另外仲有搽上花生醬,捲成花生捲.

總共9個,每款3個,出爐分開時,見到一絲絲,都好軟熟,不過而家天氣咁熱,發酵時要留意,如果唔係好容易會發過籠.

再嚟冰皮月餅

因為之前幫朋友煮麻蓉饀,剩低嘅就做多一次冰皮月餅,明日攞去孝敬我娘親,順便試吓用新月餅模.

通常木模買番嚟之後,最好用油搽勻,再放係陰涼地方風乾2-3日,然後用水洗乾淨再風乾先用,咁模就唔會咁容易爆裂,同埋甩模會好啲.

熟手技工,好快就包完,可惜今次焗燶咗麵粉,所以皮比較黃,但都無影響食味.

切開睇吓,算係皮薄餡多啩?但我就覺得冰皮甜啲,下次要減糖.

翻版KFC黑椒磨菇飯&蜜汁焗雞翼

我偶然都會幫襯KFC,主要都係食磨菇飯同埋蜜蜜燒雞翼,但價錢都幾貴,就算套餐都要成$30元,但其實材料唔算貴又唔難整,咁就不如自己動手DIY好過俾人賺.

材料有切片磨菇,加料紅洋蔥粒,已經醃過雞全翼(我切咗雞翼尖唔要),白飯.

首先開爐焗雞翼,放係烤架上,每邊焗10分鐘,然後翻轉另一面,再焗10分鐘,搽上蜜糖,每邊焗多4分鐘就攪掂.

跟住起鑊爆香洋蔥粒,蒜蓉,再落埋磨菇片,將獻汁(生抽,美極豉油,黑椒,栗粉水混合)加入煮一陣就可以盛起放係白飯面.

自己開咗罐可樂飲,咁就好似係KFC食咁,但計過至少慳番一半錢,有時間DIY真係幾好,唔錯.

豆腐麥麩方包-低溫中種

今次再焗呢個麵包,係覺得夠健康,加上盒裝豆腐就快過期.同上次稍為唔同係今次連中種都落埋豆腐代替水份,所以除咗要開稀新鮮酵母外,就無水份.

說時遲,那時快,已經到咗最後發酵,睇吓4個肥腸粉已經發至8成滿有多,所以要蓋上盒蓋準備入爐焗嚕...

照平時爐溫咁焗,但......焗完之後出爐,仲係白雪雪,祗係底部有些少微黃,唔知係咪無落雞蛋原故?不過麵包其實已經熟透,都係自己食啫,咁就無謂再番焗,由佢算啦.

切開入面睇吓,都發得唔錯,食落就無乜豆腐味,同普通方包差唔多.