黃金饅頭&蒸雞蛋糕

饅頭內當然唔會有黃金,祗不過用嚟形容金黃色蕃薯蓉,做咗兩次芝麻饅頭,所以今次改一改餡料,而發酵方法仍然用兩次發酵,類似中種,將70%麵粉,水,酵母發酵一個鐘,再加其餘粉,糖,少許油搓至麵團光滑,休息7-8分鐘,用棍來回捍壓,摺疊重複數次,鋪上蕃薯蓉.

將麵團捲成圓柱體,切成等份,作最後發酵.

蒸咗18分鐘左右就蒸熟,再揭開蓋小小約5分鐘,讓蒸汽散走,就可以完全開蓋.

因為無用壓麵機壓麵皮,所以表面仍然有氣孔,凹凸不平,但都無影響味道,趁熱食好鬆軟.

但蒸雞蛋糕就好失敗,呢個係跟網友教祗係用雞蛋加糖打發後,加入過篩麵粉,泡打粉,攪滑後,再分幾次加奶,慢慢攪勻,最後加少少油撈勻就蒸,但...點知蒸完後,完全死死實實,一啲都唔發,我懷疑泡打粉失效有關.

但又應承咗蒸俾阿媽食,於是祗好用番第一次方法,搬出電動打蛋機,將蛋加糖打至淡色加企身,再加奶,麵粉,用另一樽泡打粉,倒入模中再蒸過,今次好啲,但氣孔相當大,下次要再努力改良至得.

聖誕西甜品課-第九課-班戟伴熱橙疏乎里

上堂差唔多臨近尾聲,今日第九堂學嘅係一個飯後甜品,以前自己都好鍾意食.

首先一開始準備班戟漿,主要都係雞蛋加糖攪溶,慢慢加過篩麵粉,少少鹽,奶攪滑,最後加入坐溶牛油,置室溫約30分鐘備用.

跟住就將橙表皮刨皮切幼絲,祗係要橙色個層,唔好刨埋白色,否則會苦澀,用滾水淥一陣去苦澀味,再放入煮溶糖水中,攤涼後加入少許橙酒,可以隔日做定,咁橙絲會入味啲,而橙肉去橙衣,要淨肉作裝飾.

仲要煮橙醬汁,將橙搾汁隔渣,用pan煮溶牛油加糖煮至微焦糖色,加入橙汁煮至水份收乾一半,熄火待涼後加入少許橙酒,呢個汁亦可以隔日煮定,唔駛即日做咁怱忙.

睇吓就係呢幾樣橙xxx嘞...

一切準備就緒後就可以開工煎班戟,用抹手紙掃一層油係pan四周,用湯殼倒半殼落pan中,要即時搖勻班戟漿,平均成薄薄一層,用中火煎至班戟起泡,週邊微黃,就可以翻轉煎另一邊,因為班戟薄,翻時要快手同小心.

呢塊係我煎.

要將班戟對半摺起成半月形,再對摺多一次成為三角形.

將橙漿汁倒在碟底,放上班戟,再灑上橙絲加橙肉,就完成班戟伴熱橙部份.

而疏乎里首先就要將蛋黃,水加糖坐熱水打至杰身,加入橙酒,蛋白則加入糖,檸檬汁打至企身加入蛋黃漿內拌勻,疏乎里杯要掃油灑糖,再將疏乎里漿倒至平頂,面灑上糖霜入爐爐焗7-8分鐘就可以攞出嚟,倒置係橙皮班戟上就完成嘞.

焗起疏乎里.

Miss擺設個碟.

呢碟係我嘅,至於味道我話當然好食啦,用咗唔駛5分鐘已經清碟,但呢款甜品,準備工夫都幾多,如果自己整,要分開兩日做至得.

BB女背心+帽

舊同事生咗個女,所以我織咗呢套背心+帽恭喜佢,我自己覺得DIY好似俾人感覺有誠意啲,不過唔知收禮物嘅人係咪都係咁諗?

油浸半乾蕃茄包

係食譜書見到呢款麵包好吸引,加埋我老友好恨食蕃茄麵包,於是買齊材料就開工.

今次材料比較多,有油浸半乾蕃茄切粒,罐裝去皮蕃茄,蕃茄膏,而油就用番浸半乾蕃茄嘅芥花籽油,加埋發過夜低溫中種.

但呢款包好黏手,原本想跟書做型,結果放棄,祗係搓好後勉強捲好就入模作最後發酵,蓋上模蓋就入爐焗.

點知焗完出爐,反轉麵包係架上時,因為太鬆軟,壓扁咗表皮,唔得靚仔添.

好彩攤凍後切開,麵包組織都幾鬆軟,隱約仍然見到油浸半乾蕃茄粒,味道嘛...微甜帶酸,不過唔太感覺有蕃茄味,雖然加齊咁多蕃茄材料,一條留番自己做早餐,另外一條就送俾我老友食,叫佢俾啲意見我.

環亞佳餚精選課程-第八課-玉米薄餅&瑪沙拉羊肉

今日上堂木學嘅係印度式瑪沙拉羊肉&玉米薄餅,煮法唔太難,不過要買齊所有香料&玉米粉,尤其係有隻叫瑪沙拉香料,一定要去印度商店或City S'upr先買到.

首先睇吓香料&玉米粉先.

玉米薄餅就好簡單,祗係將玉米粉,低筋粉,水一齊搓勻,鬆弛一陣,將麵團分成等份,搓圓壓扁成圓形,用平底鑊慢火烘至兩邊熟就可以食,其實都好健康,無油,無糖,不過較為煙韌,如果凍咗會變硬要煎番熱食,或用香草,蒜蓉加入麵團搓勻用炸方法變成小食.

而瑪沙拉羊肉,就要用紅蔥頭碎,蒜蓉起鑊,炒香洋蔥粒,加入混合香料,羊肉粒,後加去皮蕃茄粒,乳酪一齊煮約45分鐘左右,最後加入椰漿,灑上芫茜就完成.

不過唔好問我好唔好食?因為我唔食羊,怕佢羶味,祗係帶咗少許番屋企俾奄尖大少試味.

芝麻麥饅頭

由於上個禮拜奄尖大少出乎意料捧場芝麻饅頭,所以今個星期再encore,不過都有些少改變,就係加咗全麥粉,多啲纖維,減麻蓉,用咗中種發酵方法,令饅頭鬆軟啲.

捲好切成等份作最後發酵.

蒸好後表皮出現豆皮,可能蒸汽溫度仍然較高,不過饅頭真係比一次直接法鬆軟好多,除咗表面唔多靚仔外,好食過上次芝麻饅頭.

聖誕西點甜品班-第八課-聖誕士都倫麵包

臨近聖誕節,所以今堂Miss教嘅都係關於聖誕嘅食品,就係士都倫麵包.

首先要做定一份液態中種,主要係高筋粉,水,酵母混合完,靜置約2-3個鐘,再將其餘低粉,蛋,牛油,酒淹過乾果皮,杏仁片,玉桂粉,豆寇粉,丁香粉混合搓至有薄膜,作第一次發酵,然後排氣分割,再靜置約10分鐘,整形.

放入有暖溫焗爐作最後發酵至3倍大,就可以放入焗爐焗,由於我哋做嘅包係迷你版,所以焗約20分鐘就可以出爐,要即刻係麵包表搽上溶牛油,再灑上高溫糖霜,睇食譜書話等2-3日後食先好味,主要俾酒味揮發出嚟喎,我試食同學仔個份,覺得唔太甜,都幾好味,我聖誕節會做呢個麵包好過焗蛋糕,無咁肥膩呀嘛.

懷舊豆沙香蕉糕

回憶細個時偶然都會食呢種香蕉糕,翻開食譜書見到原來做法都好簡單,於是買樽香蕉油番嚟就開檔試吓DIY.

首先將糯米粉,粘米粉加入已攤凍糖水(砂糖加熱水溶解),香蕉油2-3滴一齊攪勻,倒入掃油碟中蒸熟.

隔住保鮮紙搓一陣,再係糕面鋪一張保鮮紙,用棍碌成長方形.

將豆沙鋪係糕面.

捲成圓柱體,全條灑上糕粉.

再用刀切一段段就攪掂嘞.

食落煙煙韌韌,都唔錯,祗不過今次豆沙係買番嚟,我雖然已減糖,仍然覺得稍甜.

蒸雞蛋糕

我自己就唔鍾意食蒸雞蛋糕,嫌有雞蛋腥味,又唔香,但我阿媽鍾意食,所以試吓自己整嚟孝敬佢.

好似整海綿蛋糕咁,首先將全蛋加糖坐暖水打至杰身,同埋淡色,加奶再將過篩麵粉,泡打粉加入拌勻,最後落少少芥花籽油撈勻,放入模中,蒸約20分鐘就可以熄火攤凍.

我覺得氣孔好似粗啲.

剝開圍邊紙後就係咁樣.

切開睇吓都算OK,不過下次會再減糖,我諗麵粉份量都會再減啲,因為覺得蛋糕實咗啲.

甘荀包&咖啡卷蛋

今日焗咗兩款麵包&蛋糕,甘荀包祗係將紅蘿蔔搾汁加茸同麵粉一齊搓勻,再用保鮮袋索實袋口,放係雪櫃一晚,今朝攞番出嚟回室溫,之後同普通發酵方法一樣,但今次出爐後,麵包面有裂痕,我係蓋上方包模蓋焗,真係唔知點解?

攤凍後切開睇吓,麵包組織都算OK,放到明日睇吓會唔會老化變硬先?

至於咖啡卷蛋,除咗要努力實習做卷蛋外,因為上禮拜去學咖啡樹頭蛋糕,有剩咖啡牛油餡,帶番屋企用,唔駛自己再做咖啡餡.

蛋糕體用戚風分蛋法,焗好攤至微熱後,就搽上內餡,用保鮮紙捲成圓柱體,放入雪櫃雪至硬身.

雪夠硬身就可以切件,但我怕太肥膩,落得少咖啡牛油,變咗唔均勻,但蛋糕都好軟熟,明日攞去送俾朋友食.

塘水滾塘魚

塘水滾塘魚其實係魚湯浸魚,之前用剩香芧放係雪櫃,又唔想再整香芧豬扒,諗起係泰國菜館曾經食過明爐煮烏頭,靈機一觸,去街市買咗條"細鱗"魚,再買齊泰國香料,今晚就試吓整.

香料包括有南薑切片,香芧切環,檸檬葉,指天椒切絲,金不換葉切碎,唐芹,蔥切段.

首先將魚湯煮滾,將香芧,南薑片,檸檬葉滾一陣出味,後加唐芹,當再滾起後,將魚平放係香料魚湯上,慢火浸一陣,反轉魚身浸另一面,重複1-2次,直至熟透.

將魚鏟起放碟中,將香料由魚湯中隔走,下魚露,糖,胡椒粉落湯中,試味滿意後,將魚湯倒入魚碟內.

另外我用蒜蓉,魚露,青檸汁,砂糖,少少滾水調和成為"淥淋"汁,點魚食酸酸甜甜,味道好清新,而魚湯充滿濃烈香料味,同出面泰國菜館有得揮,以後就唔駛成日蒸魚咁悶嚕....

環亞佳餚精選課程-第七課-炸天婦羅蝦&芝士焗千層茄子

今日Miss教嘅係炸天婦羅蝦(日式)&芝士焗千層茄子(意大利式).

炸天婦羅蝦,首先將中蝦去殼留尾,去腸後係蝦腹部橫切幾刀,咁蝦炸完後就唔會彎曲,或者再片直攤開,放入雪櫃抽乾水份.

然後打散蛋黃,加入天婦羅粉,冰水攪勻成漿,若有粉粒,要過篩隔至粉漿光滑,落油燒至約180度C, 將蝦拍上乾天婦羅粉再放入炸漿中,然後放入油鑊中炸至變金黃色撈起隔去油份.

做埋伴蝦汁料,包括有日本醬油,味醂,水,糖,白蘿蔔蓉,少許生粉水煮滾攤涼就可以起筷嘞.

將蝦點上汁液一齊食幾好味,其實利用剩餘天婦羅炸漿可以順便炸埋蔬菜,咁就唔會浪費.

芝士焗千層茄子比較多功夫,茄子切厚片,撤一層鹽,再鋪一層茄子片,最後用重物(枮板)壓實約1小時,用水沖洗茄子片同埋搾乾水份備用.

另外將水牛芝士,油浸蕃茄乾切成粗粒狀,蕃茜葉切碎加入蕃茄醬內.

將搾乾水份茄子撲粉走油定型,然後鋪在焗盤底,加入蕃茄醬,上鋪水牛芝士粒,油浸蕃茄再加蕃茄醬,重複直至材料鋪完,面灑上Parmesan芝士碎,用錫紙蓋面,放入焗爐焗30分鐘後,揭開錫紙再焗多20分鐘,待稍涼就可以食.

因為時間關係,未涼我哋已經開餐,但仍然好味道,我諗如果將茄子換作千層麵應該都好食.