DIY開心快活人

2009年11月11日星期三

合桃香蕉Muffin

唔知點解我次次整Muffin都唔係幾掂?其實Muffin係比較蛋糕容易整,所以有時睇落越簡單容易嘅野,越考起人,不過我份人就唔容易咁快屈服,所以今日又嚟試吓再整.

我將蛋加砂糖就好似海綿蛋糕咁打到好杰身,先開始慢慢分幾次落油,奶,再落香蕉茸,最後落過篩低筋粉,全麥粉,泡打粉等輕手撈勻,再靜置5分鐘左右,先用湯匙倒落紙模中,再灑上粗粒合桃碎係面,就可以入焗爐焗嘞.

一路焗已經聞到好香蕉味,約25分鐘就可以出爐,不過升得唔係好均勻.

趁熱切開睇吓點?都叫做OK啦,至少無沉底,都幾鬆軟,不過唔知攤凍後會如何?我準備明日攞去送俾朋友食.

2009年11月9日星期一

環亞佳餚精選課程-第五課-日式味醂昆布牛肉&紫菜木魚碎飯團

今日學嘅係日式料理,包括有日式味醂昆布牛肉&紫菜木魚碎飯團,做法都好簡易.

首先用1:1比例日本珍珠米加水,隔水蒸飯,亦可以利用飯面快收乾水時放洗過切大塊昆布蒸軟,約30分鐘後熄火焗10分鐘,待飯稍涼後,加入壽司醋,紫菜木魚碎攪勻.

將飯壓入模內成為飯團,臨食時用紫菜條包住作裝飾就可以食.

至於另一款菜式,首先將薄牛肉片,最好用安格斯肥牛肉,品質比較好,用醃料稍為醃一陣,紅蘿蔔,洋蔥分別切絲,蒸軟昆布亦切條,跟住爆香牛肉片,用紅蔥頭切絲,洋蔥絲起鑊,加入紅蘿蔔絲,汁料煮至軟身,再將牛肉片回鑊就攪掂. 兩款都好味,遲啲自己都試吓煮先至得.

呢啲係做汁嘅材料.

2009年11月7日星期六

開齋食大閘蟹

每年例牌都會約埋另外兩位好朋友,買大閘蟹番屋企食,今年都唔例外,其中一位仲帶埋佢BB女嚟,眨吓眼已經成個六月大,係一個好可愛,成日笑嘅BB.

蒸之前當然要將大閘蟹洗刷乾淨,係朋友去訂一蘿(約有19隻),每隻有成7-8兩重,全部蟹公,都好大隻.

洗完後放上紫蘇葉,薑片一齊煎熟,加埋秘製薑醋汁,就可以開餐嚕....,其實我自己都帶咗鹵水雞腎,蛋,鴨舌去加料,不過掛住拆蟹,無影到.

打開蟹殼,個啲蟹膏黃油流哂出嚟,橙黃色,好好味呀!不過我嘅極限都祗係食兩隻已經覺得好滯,後來仲打包兩隻帶番去俾奄尖大少食,雖然佢已經食完晚飯,都拆咗一隻蟹,什麼膽固醇過高問題,已經拋於腦後囉.

2009年11月6日星期五

聖誕西點甜品班-第五課-牛油果蝦沙律

今日學嘅唔係蛋糕甜品,而係一個頭盤,主要靈魂係兩個醬汁,分別係蛋黃汁&黑醋汁.

材料包括有蕃茄去皮切丁,

鮮蝦連殼去腸煮熟,浸冰水再去殼雪凍備用,

牛油果用匙羹挖肉切丁,用些少檸檬汁撈一撈.

呢度有主要做醬汁材料,右手邊呢支意大利黑醋好貴,成$24X,倒出嚟好杰身,右二係英式芥末醬,跟住個支係白酒醋,左手邊係蜜糖,其實仲有HP醬,MISS用近,所以影唔到.

首先講蛋黃醬汁,要將蛋黃加芥末醬打至變淡色,加入白酒醋,適量蜜糖,胡椒粉,鹽等攪勻,再慢慢加入菜油,要逐少逐少加,否則好容易油份分離,最後加入檸檬汁,亦要逐少加入攪勻至杰身.

完成之後就係咁樣.

再嚟整黑醋汁,主要同沙律菜撈勻一齊食.將黑醋,蜜糖,菜油,黑椒粉,鹽等攪勻就掂.

現在開始可以逐樣放入圓形吸模中嘞,首先底層係將HP醬,辣椒醬同牛油果丁,蕃茄粒撈勻,中層係將蛋黃醬撈鮮蝦,頂部放上黑醋汁撈勻沙律菜就完成.

沙律菜係大型超市有得賣,但要成$3x架.

砌好後攞開個模,係碟邊滴上黑醋,蛋黃汁做裝飾. 試食後都好清新,但要買咁貴醋做醬汁,好似唔係咁值,到時真係想整先再諗吓或者搵啲無咁貴黑醋.

2009年11月4日星期三

失敗造型花花麵包

係日本麵包網站,見到個花型方包,好靚,就抄佢個食譜落嚟,自己試吓跟住整.

首先將麵團搓好後,1/6麵團加入綠茶粉變成綠色麵團,1/3麵團加紅色素變成紅色麵團.

照一般發酵情序後,將紅/綠/部份白麵團切成需要闊度嘅麵條.

將白麵條分別同紅,綠麵條重疊,碌闊.

再依圖形捲好.

外面再以白麵團包裹住整團顏色麵團放入方包模內作最後發酵,就可以焗嘞.

焗好出爐同普通方包無大分別.

但.....攤凍切開後,朵花完全走哂樣,望落去完全睇唔出係乜東東?原因可能係捲花芯時捲得唔好,發覺用麵包造型都幾難,好多時發酵後會唔同哂,當然麵包仍然都好鬆軟.

呢張就係日本麵包網站登個麵包樣,真係差天共地呀

2009年11月2日星期一

環亞佳餚精選課程-第四課-意大利香草醬闊條麵

首先要做闊條麵,材料主要有"00"度意大利麵粉,全麥麵粉,蛋黃,全蛋,全部搓勻成團,如果太乾可以用手濕少少水,要鬆弛30分鐘或以上先可以用.

跟住將麵團切成5-6份,用粉灑係麵團表面,用手壓至扁平,再放入壓麵機由厚至薄度數壓薄.每過一次機都要灑粉一次,避免黏埋一堆.

到一定厚度時,係面灑粉,再鬆手捲成圓筒狀.

用刀橫切一圈圈,再揚散成麵條.

放入已放鹽滾水中,淥至滾起,加一碗水,再滾時就可以撈起.如果有剩麵條可以攤開,放係室溫至乾身,或用盒蓋起放落雪櫃內.

至於香草醬,係用新鮮羅勒葉,炒香松子,加橄欖油用機打成茸,倒落煮熟闊條麵內撈勻,灑上芝士粉,炒香松子粒就食得啦. 味道唔錯幾好,會考慮日後自己試吓整.

2009年10月30日星期五

聖誕西點甜品班-第四課-聖誕薑餅屋

Miss 應同學要求,提早教整薑餅屋,咁就可以多啲時間練習,有問題可以下堂問.

主要將薑粉,麵粉,玉桂粉,丁香粉,豆蔻粉,梳打粉加入煮溶蜜糖,黑薑糖,牛奶,雞蛋中搓勻,放入雪櫃至少20分鐘,或者隔一夜.

至上要切四塊,兩塊屋頂,兩塊牆壁.

長形係屋頂,三角形係牆壁,入爐前要叉洞,但仍然唔平,因為我碌得唔夠平均.

打起蛋白,糖霜硬身後就可以砌屋,因為時間關係,無做平台,用白紙墊底就算.

呢間係Miss整嘅.

呢間係我整嘅.

最後係全部同學嘅作品,真係各有特色,好有創意呀.

2009年10月29日星期四

玉桂蘋果包&南瓜餡辮包

拜完山後攞咗啲蘋果番嚟,但又無乜興趣食,於是攞佢嚟整麵包.

首先將紅蘋果去芯切塊,用少少水,1/3個檸檬煮到蘋果軟身,將檸檬拎走唔要,加糖,鹽調味後,再用攪拌機打成茸備用.

另外將青蘋果去芯,去皮,切粗粒,用少少牛油,砂糖煮至微黃,再加入蘋果粒,檸檬汁煮剩一半汁,加入浸透Rum酒藍莓乾,再將麵粉水倒入煮至杰身,攤凍成餡.

將蘋果茸,中種麵團一齊加入主麵團搓勻,經過第一,二次發酵後,分成等份,搓成長形,放入煮好蘋果粒,捲成長條形.

再將麵團打結放入模中作最後發酵,發至約2-3倍大,搽上蛋汁就可以放入焗爐焗.

焗好出爐就可以甩模攤凍.

同一份麵團,包咗上次用剩南瓜茸做餡,做咗個四辮包.

兩款都唔錯架,so far so good 啦.

2009年10月23日星期五

聖誕西點甜品班-第三課-意大利青瓜合桃提子蛋糕

今日學嘅係意大利青瓜合桃提子蛋糕,做法唔複雜,祗要將所有材料撈勻,加入打起蛋白就完成,所以中間個程都無影低.

材料包括有意大利青瓜刨絲,焗香合桃切碎,焗香葵花籽,全麥粉,泡打粉,什香粉,梳打粉,玉桂粉,用蛋黃全部撈勻,再加菜油. 蛋白加黑蔗糖粉打起勾狀再同麵糊撈勻,倒入模內就可以焗,爐溫同埋焗時間要視乎模具大細而定,細模爐溫要高,但時間要短,相反亦然.

用焗盤焗,但蛋糕唔係好升高.