紅蘿蔔方包

打開雪櫃見到有半條紅蘿蔔,就將佢打成紅蘿蔔汁加茸,同麵團混合,焗咗呢款紅蘿蔔方包做早餐.

自製中秋月餅

一年一度嘅中秋節又快到,梗係要趁機練習整月餅喇,今日約咗朋友仔嚟我屋企一齊整,但由於時間關係,之前我已經煮咗蓮蓉餡,奶黃餡,同埋搓定餅皮,原本可以係烘焙店或街市買到蓮蓉餡,但試過覺得好多油,好甜,為咗健康著想,所以雖然工夫麻煩啲,都係DIY好啲.

今日主要係包餡,入模做型,同埋焗,不知不覺都要用咗兩個幾鐘先完成.

呢款係蛋黃蓮蓉月,鹹蛋黃要事先蒸熟,再用蓮蓉包裹住,不過剛焗完,餅皮比較啞色同埋硬身,要放係室溫等佢回油,先會油潤架.

趁攤涼後,急不及待即時切一個試吓,朋友覺得味道都OK,而且有陣陣香味,又唔太甜.

呢款比較迷你嘅係奶黃月餅,但係朋友帶嚟嘅"Hello Kitty"模,焗完後完全無哂樣,木印幾個就模模糊糊.

雖然賣相麻麻,但唔影響味道,祗係再減糖就更完美嘞.

食完晏見仲有時間,於是我提議焗蜂蜜蛋糕, 可惜今次仍然有啲沉底,要再研究改良先得,而且因為用哂高溫龍眼蜜,用普通蜜糖,所以蜜糖味唔太明顯,要努力再改進.

朋友仔仲送咗個自己縫製針線包俾我做禮物,真係多謝佢.

呢款書籤係佢上次送俾我,仲绣咗我個英文名,真係好有心機同誠意, I like it.

粟米芝士包

基本上而家整麵包都係見到有乜材料係屋企就整乜野包, 今次係雪櫃搵到粟米粒同芝士片,所以就整咗呢款粟米芝士包.

因為懶惰無將麵團磅好平均兩等份,結果變成邊大邊細.

切開見到有洞洞就係芝士溶咗,但間中換吓唔同風味都幾好,雖然隔咗一日先切開,麵包仍然柔軟,果然用開低溫中種好難轉用其他發酵方法.

綠茶豆沙麵包卷

見到雪櫃仲有豆沙餡,但又唔想哂咁多時間做細包,逐個搓同包餡,所以就整咗呢款麵包卷.

焗好外面好似普通方包一樣.

但切開就會見到一卷卷豆沙餡,有好清新綠茶香味,但豆沙餡就稍為甜咗啲.

香茅豬扒撈檬

今日約咗志趣相投朋友嚟屋企,一齊焗麵包,晏晝都係自己整,我同佢都好鍾意食香茅豬扒撈檬,所以今日午餐就係呢款嘞.

豬扒係用咗自己種嘅香茅同埋九層塔醃,味道特別濃,加上用新鮮豬扒,好味到我哋兩個人食哂成兜粉.

至於麵包,今日試吓做咗呢款杏仁醬花生麵包,麵團無加任何油,祗係加咗花生醬代替,而麵包面就搽上杏仁醬,但因為錫紙蓋唔到全面,結果有部份燶咗,但切開仍然好鬆軟,好好食.

柚子蜜戚風蛋糕

想整蛋糕俾阿媽食，打開雪櫃見到樽柚子蜜，好喇就決定整咗呢款柚子蜜戚風蛋糕。

焗完倒扣後就向下縮埋一堆。

跟住甩模，個樣都ＯＫ。

切開迫不及待試吓食一舊，都幾好味喎，唔知係咪肚餓呢？

雙色芝麻包

我成日都係整一條條方包,主要係方便慳功夫,又可以保持麵包柔軟,但其實都好悶呀,所以雖然係方包,都要攪攪新意思,好似今日焗呢款就係嘞.

外面同平時普通方包無乜大分別.

但...切開後,就唔同樣,主要將部份麵團加入芝麻粉,再將兩份麵團捲起,就有螺旋紋出現,有啲變化之餘,仲有芝麻香味添.

香蜜花生醬

買咗包生花生豆番嚟好耐,今日終於攞嚟整花生醬,首先將生花生豆白鑊炒至有香味.

攤凍後去衣

6

再用攪拌機打爛成茸,中途要停機多次,將花生茸攪散,同埋郁動攪杯,因為花生打爛後會出油,黏埋一舊舊,但又未變成醬,最後打至見到出油,成團狀攪唔郁,就加些少花生油,鹽,蜜糖調味,再攪多一陣,就可以放入已用滾水煲過玻璃樽內攤凍. 因為百分百用花生做,味道真係比街賣香好多,而且無加白油(反式脂肪),咁就健康好多,唯一缺點係因為無落防腐劑,加上放室溫會有油浮面,所以要擺在雪櫃內雪藏,用時要再放入微波爐稍為加熱至軟身,才可以食用.

另外因為明日約咗舊同事食晏,所以做咗幾支潤唇膏送俾佢哋,今次用咗荷荷巴油,甜杏仁油,可可脂,蜜臘做,無落精油,搽上咀唇都好滋潤,希望收到嘅人會高興喇.

無花果黑糖麥包

今次用咗之前去沖繩旅行買番嚟黑糖,加浸咗Rum酒嘅無花果乾,再加全麥粉,令到纖維增加,就變成呢款無花果黑糖麥包.

俾一塊奄尖大少試食後,竟然破例要求留幾塊俾佢明天做早餐,証明麵包好食喇.

首烏艾草分層洗髮皂

由於開始慢慢習慣用人工皂洗頭,於是前兩日開工做洗髮皂俾自己用,油份有椰子油,棕櫚油,蓖麻油,茶花籽油,添加物有首烏粉和艾草粉,今次試吓做分層,仍然全程用手打,約20分鐘後已經trace夠杰身，將1/3皂液同首烏粉混合，另外1/3同艾草粉混合，再逐層倒入模內。

今日可以切皂，但甩模時好淋身，下次應該再等多兩日應該會硬身啲。

個樣係咪好似黑白朱古力呢？可惜艾草粉同首烏粉都係深色，所以層次唔得明顯，應該將原皂液夾係中間層，出吁嚟效果會明顯啲。

用波浪切刀切花紋，好期待試吓好唔好用？　不過要等４－６星期先可以用，真係等到頸都長埋。

香蕉合桃包&熱狗包

今日焗咗兩款包, 分別有香蕉合桃包&熱狗包.

香蕉合桃包主要將香蕉壓爛成茸加入麵團一齊搓勻,完成發酵程序後將已經焗香合桃壓碎捲入麵團中,再將麵團橫切一開二,不過唔好切斷,切口反向上,最後發酵完之後就可以焗喇.

切開試食後,,麵包雖然軟熟好食,但香蕉味唔太濃,下次要加大香蕉茸份量至得.

至於為乜要焗熱狗包? 原因係之前見到超市賣呢款珍寶熱狗腸特價,所以買咗一包,但街出面賣嘅熱狗包真係唔掂,好似食棉花咁,所以就順便自製熱狗包用嚟夾熱狗腸食.

椰絲檳

呢排成日都係整方包有啲悶,所以就焗咗呢個椰絲檳轉吓口味,椰絲餡料減咗油,糖,但焗出嚟聞到好香椰絲味.

捲好饀料後,中間切開但唔斷開,放入麵包模內發酵,最後搽上蛋汁,就可以焗嘞.

,

睇吓已經焗好出爐,聞到陣陣椰子香味,攤凍後,即刻切一塊食,真係好好食.

頂角北海道牛奶方包

今次用咗3.6北海道牛奶代替水份搓包,仍然用低溫中種發酵,因為加夠筋粉,所以可以焗到頂角嘞,真係開心.

隔咗一日先切開食,麵包仍然好鬆軟,而且有香味,真係好好食!

自製健康低鈉豉油

有日偶然行入一間賣台灣食品店舖,發現咗呢包釀豉油黑豆,睇吓膠袋後面說明都好容易做,於是就買咗佢番嚟,自己煮健康啲低鈉豉油.

一打開袋口已經聞到好香豆豉同酒味,將黑豆豉加水放入攪拌機打爛,再加適量低鈉鹽,水份,細火煲2.5個鐘.

熄火後用袋隔去豆渣兩次,就可以入樽,但由於無落防腐劑,所以攤凍後要擺係雪櫃,以一豆包份量,大概可以做3支豉油左右(650ml),價錢同買現成差不多,但豆味濃好多,顏色亦深啲,因為係黑豆,而且又可以再調教成甜豉油,辣豉油等, 食完後有機會都會再整.

拼布相機袋

用開嘅相機袋開始破爛,正好趁此機會可以練習做拼布手作,上網搵到一個比較簡單拼布圖案,再計算實際呎吋,用番之前裁咗唔啱色碎布塊,就拼接完成,仲加埋裡布.

疏縫一圈後,將頭尾滾邊,亦即機套蓋和開口,順便縫埋魔術貼,然後由下向上屈折固定,用捲針縫埋兩側邊.

再滾邊於兩邊,將另一塊魔術貼縫上就完成嘞.

放入相機試吓個位,發覺袋闊咗啲,因為要遷就圖案關係.

最後加埋吊帶就方便旅行時可以揹住相機四圍影嚕...., 做咗咁多個拼布作品,終於好似掌握到一些技巧,但仍然未決定以後係咪會繼續做落去? 再做多一,兩樣作品再算.