淘寶網購

而家係淘寶買野,唔好淨係見到貨品價格平就買,仲要計埋運費,今次得到朋友介紹用開集運,同埋詳細解釋流程,於是就膽粗粗,自己試吓買3個不同地方貨品,再用集運,非常成功,祗係比用直運到香港多兩日時間,但價錢...就平好多,不過可惜係祗有一個係國內包郵,另外兩個都要俾國內運費,好彩唔算貴,買到心頭好就好了.

五穀雜糧鄉村包

今次加入五穀雜糧粉,除咗可以增加膳食纖維外,亦會增加麵包香味.

今日下午茶點-焦糖杏仁蛋糕卷

今日一早又開始落雨，令人好鬱悶，係雪柜見到有盒就快過期淡忌廉，於是決定整呢個焦糖忌廉杏仁蛋糕卷，除咗蛋糕內加咗杏仁粉，焦糖忌廉內亦加入焗香打碎杏仁粒，所以食落好香，不過下次蛋糕糖份要再減，覺得稍甜啲。

布藝-小配飾

春雨綿綿,無特別事都係留係屋企好過,搵番老友送嘅材料包,做咗呢個可以作衣服裝飾或吊飾用配件.

繼續鄉村包

為咗令奄尖大少不會斷糧無早餐,出街食埋唔健康麵包,於是繼續整呢款包,不過次次做法都有啲唔同,今次係麥芽糖水同棵麥粉,高粉,全麥粉攪拌成團約4小時後再加酵種,呢個方法叫浸粉,係由日本麵包書睇番嚟,而且縮短室溫時間一個鐘,令麵團無發到咁高放入雪櫃15小時,室溫回暖兩小時後再整形個半鐘,不過出嚟效果又同前幾次差別不大喎.

13小時全麥方包

經過漫長發酵時間,由早上7點幾攪到晚野成8點,終於有包食喇,主要原因我想麵包組織綿密啲,減咗1/3酵種,延長發酵時間,果然效果係好好多,不過肚餓就唔好用呢種方法喇,否則餓死都未有得食,

再嚟柑橘果醬

見到生果檔仲有柑橘賣,於是買多兩磅番嚟煮,不過今次酸些,無上次柑橘咁甜,無添加任何水份,100%果肉,果皮同糖,少甜,準備當手信送俾朋友.

啡色西樵大餅?

 其實係棵麥全麥包,用埋天然酵母酵種,經過我不斷嘗試改良,參考其他高手網誌後,
1) 今次攪麵團時間縮短約7-8分鐘,水份亦成70%,跟住室溫每半小時向四邊折疊5-6次,室溫再放一個鐘,放番雪櫃一晚
2) 朝早攞番出嚟回暖兩個鐘,可惜麵團勁黏手,就算鋪布都黏實,最後求其灑上黍米粉放入爐
3) 石春同埋焗盤預早加熱至250度,放入麵團後,立即倒入200g暖水,10分鐘後移出石春焗盤,再將麵團焗盤移上中層,降低爐火至220度,焗多10分鐘就得嘞.
都係要快些買番個滕藍發酵先,今次算做得比較好,睇吓包肉啲大洞洞,好濕潤軟熟,同歐陸包有9成接近,亦令到外皮薄脆啲,連屋企奄尖人都話今次幾好食, 一切開已經食咗1/4個,明朝仲帶埋返工當早餐食添,真係捧場.

格仔餅_預伴粉

朋友俾咗盒pancake/waffle預伴粉我,於是趁今日得閒開機整吓,今次無落糖,同埋祗係落咗少少芥花籽油,夠晒健康.

小法包

小法包-不枉我專程去買特製法包粉,加埋天然酵母培養酵種,亦都有參考其他法包高手網誌,集各家之大乘,呢次算係比較滿意喇.

雜莓果醬

 剛剛果醬食完,難得一見有桑椹賣,所以就索性買埋草莓,藍莓混合一齊,做咗呢樽雜莓果醬.

山形土司-白神山酵母

今次試用朋友送俾我另外一隻日本天然酵母,雖然發酵時間比平時長,但焗好後外皮脆到裂開,而麵包肉好軟熟,所以即刻整份腿蛋治,作為下午茶,不過仍有不足係心急,排唔晒氣,結果氣孔大咗些.另外半份我用咗嚟培養酵種,下次再用.

又嚟鄉村包(混合酵母)

係咪大家都有啲悶呢? 無法喇,因為暫時得呢款麵包奄尖大少先肯捧場,唯有整呢款囉,不過今次因為見到天然酵母威力開始減弱,於是加咗少少速發酵母,加快發酵時間,但食唔出分別嘅.

柚子蜜葛粉圓

朋友送嘅日本葛粉,聽講好有益,我加咗少少大菜糕粉,令糕身硬身啲,但質感就好糕,而且煮嘅時候好黏稠,倒落模都比較困難.

雙酵種鄉村包

今次加多一種用黑麥粉(Rye flour)培植酵種,而且又加入全麥粉,增加膳食纖維,麵包質感同上次差不多,但小麥香味無上次咁強勁.

菲林嚟喇（芝麻卷)

芝麻卷係好多人童年鐘意食甜品，me too. 今次我專登唔隔芝麻渣，雖然質感粗孩啲，但芝麻味會比較濃郁，而且多些纖維，好食。

健康country bread

老友送嘅日本天然酵母,雖然培植酵種比較繁複,同需要長時間,但焗出嚟麵包皮脆包心軟熟又帶些少韌性,連屋企奄尖人都一口氣連食兩塊,因為無油,少許麥芽糖同埋鹽,可以食到小麥香味.
唯一係麵團相當黏手,完全做唔到形,祗好一團咁放落烤盤焗,但估唔到天然酵母威力都好勁,一放入焗爐好快就向上升起,而且喂完粉後3-4個鐘打麵團,都發得好快,不過酵種要隔2-3日喂養,唔用都要倒掉一部份再加粉/水,好似有些浪費啫.

柑橘蜜

每年過完新年,生果檔都有柑橘賣,我都會買嚟整柑橘蜜,今年都唔例行,用佢可以作果醬搽麵包,因為煮得夠杰,或者整蛋糕,麵包,或者沖水飲,可以舒緩喉嚨痛,Good!
不過今年煮得比較粗糙,因為見到柑橘好甜,所以用埋原本唔要果肉,去核後無將果肉再切碎或攪碎,所以會食到粗纖維係裡面.

湯圓兩吃

今日係元宵佳節,等我又嚟湊吓熱鬧,湯圓兩吃,一半用薑片糖水煮,一半做糖不甩.

香滑芝麻糕

新年時買咗好多種唔同粉嚟蒸糕,為咗要滅粉,所以就整糕,今次我炒芝麻後再攪爛成芝麻汁,所以芝麻味好香濃.

十字繡布袋

同學送咗兩塊佢自己繡嘅十字繡俾我,我就用佢做咗呢個布袋.

再加兩張第二日日頭影得清浙啲,因為諗住呢個袋送番俾做十字繡同.

牛奶餐包

今日有心情幫包包做吓形,趁新鮮出爐,即刻用黑松露菌醬,+什香草炒蛋,再加上札肉,就係我今日晏晝,唔....好好味,至緊要係新鮮.

家鄉鹹薄撐

今日新攪作-家鄉鹹薄撐,材料比酒樓多一倍,煎好即食,邊好脆又軟熟,非常好味,可惜比較油膩,熱氣,唔可以多食.

同場加影仲有今年第3次蒸馬蹄糕,因為上次蒸完仲有馬蹄剩低,其次想再試彈牙馬蹄糕食譜,但嫌仍未夠彈牙,有機會再試.

橙汁蜂蜜雜果包

有人買咗好多橙過年,又食唔晒,趁焗麵包就索性榨橙汁當水份,加埋橙皮茸,提子乾,藍莓乾,無花果乾,蜜糖整包,唔錯,幾好食.

清甜蔗汁馬蹄糕

新年之前整馬蹄糕已經送晒俾屋企人,自己變咗無得食,今次改用新鮮蔗汁,仲加加咗啲木薯粉,結果係...竟然無上次咁煙韌,睇嚟下次又要用番原來食譜嘞.

初一食齋

按照年初一習俗,清理吓腸胃煮齋食,材料包括有旺菜,支竹,冬菇,白果,粉絲,紅棗等.

滷水墨魚&豆腐

趁今日整開滷水牛展,順便買多一隻新鮮墨魚,同埋豆腐試吓一齊滷,墨魚淖一淖就要撈起,等滷水攤凍再浸,肉質唔鞋口,豆腐蒸完再浸唔會散,幾好食,唔錯.

蒸糕最後一擊-紅棗年糕

今日蒸埋甜甜蜜蜜紅棗年糕就可以收爐，今次用咗新食譜又減糖，呢個食譜要一日前用攤涼一半蔗片糖水同糯米炒撈勻,第二日再加埋剩低糖水及椰汁,不過我無加椰汁,睇吓好唔好食先？

蒸糕第二擊-蘿蔔糕&芋頭糕

今日繼續密密蒸糕,分別有芋頭糕同埋蘿蔔糕,不過淨係切兩斤蘿蔔絲都切到我手軟,但為咗真材實料,食落自己肚內,辛苦啲都值得嘅.

Encore牛奶饅頭

上兩個禮拜,唔知整乜鬼? 好似撞邪咁,焗西式麵包唔得,蒸中式饅頭又唔起,今日捲土重來,今日就順風順水,兩樣都發喎,雖然外表氣泡大咗些,但食落都鬆軟.

開始啟動蒸糕嘞

計番就快過新年日子,又開始蒸糕喇,但而家唔會好似以前咁一氣呵成,由朝到晚不停蒸糕,攪到自己得番半條命,今日首先打頭陣係蒸馬蹄糕,呢個食譜係網上搵到,話係彈牙馬蹄糕,而我一向蒸嘅馬蹄糕都比較削,稔身,麻麻地好食,所以當然要試吓喇,因為新鮮蒸好,未夠硬身,所以要明日先可以試到係咪彈牙?

糕顏色咁深係因為用多咗黃糖,但我已經減糖,

山形牛奶方包+檸檬蛋糕

好耐之前應承某人會請佢食麵包,蛋糕,今日終於一氣呵成,做齊兩樣,檸檬蛋糕攤凍後會再夾檸檬奶黃醬,咁就檸上+檸喇. 

蜜糖杏仁小蛋糕

準備用作明日送禮手信,最佳食用時間應該係焗好第二日,因為可以令蜜糖沁番入蛋糕內,會比較濕潤,無咁乾.

cannelé (可麗露)

cannelé (可麗露)-係一種法國著名小蛋糕,特點在於外層用蜂蠟包裹蛋糕,令到蛋糕外脆內軟,原本應該用銅模焗,但價錢太貴,而且不易買到,於是改用矽膠模,但效果無銅模咁好,外皮上唔到焦糖色,脫模後再番焗,才勉強似樣,溶蜂蠟都好麻煩,所以應該唔會再整.試食後幸好仍然外脆內軟.

全麥方包-麵包機

我好少用麵包機自動程式,嫌程式太固定,唔可以因應麵粉質感,氣溫,濕度改變,今次破例試吓用全麥包快速設定,不過我用咗低溫中種發酵法,切開睇嚟效果都OK,咁以後可以乾手淨腳啲.