慳家之作-自製薑汁酒

以往都係買開現成薑汁酒,貪佢方便,當醃肉,醃魚一次攪掂,不過今年物價貴得驚人,所以慳得就慳喇,而且又無乜難度,祗要將你用開嘅燒酒,或米酒,或紹油,加埋已刨皮薑塊放入攪拌機攪爛,再過濾,倒番入酒樽就OK, 不過放一段時間會有薑沉殿物,用時再搖勻就無問題,至緊要成本平過現成一半.

又一新攪作-雞肝醬

差不多逢肝類我都鍾意食,不過就覺得鵝肝雖然幼滑同香,但食完一小塊已經覺得好肥膩,上星期巡網俾我發現到原來可以自己DIY雞肝醬,立即搵到幾個啱心水食譜,自己再改良吓,今日買咗半斤雞肝番嚟,試吓DIY先.
經過一輪工夫,今次我用半蒸焗方法,終於出爐嚕....,不過食落質感無鵝肝咁滑,粗孩啲,味道就OK唔錯喎.

Baking day-Boston Cream Pie & White Bread

趁今日得閒,焗咗之前好想整波士頓忌廉批,其實即係忌廉蛋糕,祗不過用咗批碟焗蛋糕,用戚風蛋糕體,攤凍後再切開3片,夾入忌廉餡,我做咗一層原味,另一層朱古力,咁就無咁單調.

蛋糕面買相唔靚,因為將多餘忌廉搽上面,再加糖霜灑上去.

不過切開嚟食就真係好好味,我用咗淡忌廉+魚膠片,因為我唔鍾意用甜忌廉(植脂),反式脂肪較多,無咁健康.

除咗焗蛋糕外,仲開埋部麵包機一齊焗白方包,近排試驗後,發覺祗係用機"攪麵團"和"焗"功能,麵包組織都OK,主要係貪唔駛洗咁多工具.

一氣呵成共6款口金包

已經好耐無做過布藝手工,之前買嘅布布,口金架晒咗好耐無郁過,前兩日終於開工,一次做咗6個,準備聖誕或新年禮物送俾朋友,雖然手工麻麻,祗係勝在夠誠意.


背面花紋都有啲唔同,不過就素啲.

是日甜品-元肉紅棗雪耳糖水

主要係想消滅存貨,唯有盡量諗辦法食咗佢,好過要掉,自己煮糖水可以少甜,唔似出面賣糖水,總係覺得好甜,好耐無煲過雪耳,原來都要煲好耐,大概成45分鐘,叫做勉強夠諗,仍然有啲爽口.

防晒保濕日霜

為自己整嘅防晒保濕玫瑰日霜-今次用咗一種新材料,紅景天萃取液,係生長於高山植物,可以防紫外線,當然唔少得有二氧化鈦(防晒),保濕有甘油,Vita B5,仲有玫瑰花浸泡橄欖油,玫瑰花水,玫瑰花精油等等.

因為加咗二氧化鈦,顏色本來好白,於是就加咗少少色素,果然變得靚好多,不過呢啲整色整水野,同面霜質地無乜關係,祗係外觀而已.

健康燕麥糠牛奶方包

呢排主要都係用麵包機攪麵團,加第一次發酵,再攞麵團出嚟人手放氣,再做形,放番入麵包兜內作最後發酵,再按麵包機"焗"功能焗麵包,雖然可能俾人手焗麵包多咗啲時間,但係好處係唔駛洗咁多工具,又唔駛用完麵包攪拌機,又再搬焗爐出嚟焗麵包,但仍然要用中種發酵,咁出嚟麵包組織,同鬆軟程度都差唔多,將要求降低少少,但可以慳水,慳洗潔精,同埋時間洗野,都值得代替人手焗麵包要求.

今次將麵團一分為二,再捲成長條形,將麵包機中間攪拌漿拔走,將長形麵團放回入麵包兜內,按"焗"掣就得喇.

放涼後切開望吓,麵包組織都OK架.

今日飯後甜品-燉鮮奶蛋白+燕窩

今朝整Brownie剩低蛋白,於是食完晏就加鮮奶燉,再加之前燉好燕窩,咁就非常容易有甜品食嚕....,係出面街食特價都要成$40-50一碗,真係不如自己郁吓手好過.

香蕉合桃Brownie

好耐都無整過呢款蛋糕,因為自己唔係咁like朱古力,今次因為知道朋友鍾意食,所以整嚟請佢食,今次跟日本食譜,蛋糕除咗有碎合桃,仲加咗香蕉蓉,杏仁粉,祗係dark朱古力多咗,加上少糖,有啲苦澀味,唔知佢鍾唔鍾意食呢?

杏仁粉去角質洗面奶

見到以前買落嘅洗面奶差不多用完,而家去上完堂已經知道點做,梗係自己DIY喇,今次用咗橄欖油,再加椰子油起泡劑,氨基酸不流淚配方起泡劑,TWEEN80, 係咁意攪吓已經好杰身,左手邊個支無乜特別,而右邊粉紅色蓋個支就加咗杏仁粉,咁就可以當輕微磨砂,去角質用,試洗完面後,塊面一啲都唔乾,唔錯,以後又多一樣護膚品可以DIY嚕....

今日甜品-生磨杏仁茶+燕窩

見到仲有燉好燕窩剩,係咁食好似單調啲,於是就浸咗一小撮杏仁,米一齊,下午就用攪拌機攪成杏仁米漿,蓄意唔過篩,寧願犧牲口感無咁滑,但就唔會浪費有益,有營養價值嘅杏仁碎.
攪完倒入煲裡面,煮至杰身加少少糖,撈埋燕窩落去就食得嚕...真係夠晒滋潤,補身.

今日西式午餐

今日有朋友到訪,所以煮咗個西式午餐請佢食,首先有南瓜忌廉湯,湯底係自己煲魚湯,無落味精架,湯面灑上雜香草,因為想食多啲纖維,所以無用攪拌機攪爛再過篩.


跟住就係呢個蝦仁黑松露菌香草醬意粉,仲加咗煙肉,紅洋蔥碎,蒜蓉,味道好香,好惹味,唔錯.

最後食埋呢個滋潤嘅燕窩燉杏汁鮮奶蛋白,真係飽晒嚕...

金盞花玫瑰花保濕精華液

開始踏入冬季,天氣亦變得乾燥,最緊要加強保濕,呢支保濕精華液,用咗金盞花萃取液,水溶性荷荷巴油,氨基酸加強保濕劑,玫瑰花水.

罌粟子芝麻包

唔想荒廢部麵包機唔用,於是今日就半自動式,用麵包機搓麵團,+人手滾圓搓包再放番入焗盤中,再開麵包機烘焗功能,但之前做咗個中種,放係室溫發酵兩粒鐘再加主麵團,其實唔慳得幾多工夫,祗係測試可行性,明日再試吓麵包組織是否OK?

蟹柳雜菜燒餅

今日我嘅午餐,簡簡單單蟹柳雜菜燒餅.

首烏茶籽洗髮皂

本來想做渲染,點知皂液好快就over trace,結果變成矇矇矓矓分層,今次用咗圓形模,切開之後好似蛋糕咁,不過洗時揸手應該唔係咁好,下次都係唔好用圓模.

蜜糖鄉村裸麥包

準備要做麵包,見到有包裸麥粉未用完,於是就做咗呢款蜜糖鄉村裸麥包,可惜麵包面界花紋唔夠深,影響外觀唔夠好睇,不過同麵包組織和味道無乜關係.


因為用咗17小時低溫中種發酵,所以麵包好柔軟,不過裸麥粉味道唔係個個人都鍾意架.

香蔥火腿蛋餅

今日突然諗起每次去台灣,都會去永和飲豆漿,食蛋餅做早餐,於是即刻上網搵吓蛋餅食譜,下午就開工整,首先搓好麵團,靜置完畢分割成小團,再碾薄成小圓餅,煎熟成餅皮.

再將切碎蔥粒同埋蛋漿撈勻,倒入煎pan內,蓋上餅皮,反轉鋪火腿係面,捲埋切開就食得嘞,因為新鮮現做現食外皮脆又有蛋香,幾好味,不過當餅皮冷卻後,可能會變硬,下次食時要加熱,令佢軟身番先食得.

應節南瓜芝士焗餅

萬聖節就快到,之前有食剩南瓜,所以就索性做咗呢款焗餅,但因為芝士份量唔夠,唯有用淡忌廉補夠,再加埋南瓜蓉,所以芝士味唔夠濃,但味道都OK,希望收到朋友唔好嫌棄就好嘞.

用低溫隔水焗咗50分鐘,終於可以出爐喇.

攤凍再放入雪櫃雪一晚先甩模.

切開睇吓買相唔錯,祗係味道比較淡啲,不過勝在夠健康.

腐竹意米白果糖水

基本上我係唔鍾意食糖水,咁點解會煲糖水呢? 都係因為上次煲腐竹白果粥剩低腐竹,見到話意米都好有益,於是就破例煲少甜糖水,不過原來浸完再煲意米發漲好多,結果好似煲到好杰,似粥多過似糖水,不過費是加水溝稀,始終都係食落自己個肚, 遲啲會再煲意米水,用完腐竹又剩意米,真係循環不息呀.

奇雅籽(Chia Seed)方包

今次用咗奇雅籽(Chia Seed)做方包, Chia Seed係南美野生鼠美草種籽,含有豐富Omega3, 係三文魚3倍,仲有Omega6,用水浸泡後會發漲,外國人用佢作減肥之用,因為食咗後會飽肚,我就用佢做湯種同麵團混合搓包,但係非常黏稠,如果無攪拌機用人手搓包,就好難搓得成團,祗係落咗些少芥花籽油,始終無低溫中種發酵咁鬆軟.

是日午餐-腐竹白果粥+芽菜肉絲炒麵

好耐都無煲過腐竹白果粥,次次煲粥都勁黏底,加上唔太好食粥,但而家發覺原來可以隔晚浸米後,大火煲十分鐘左右,然後熄火焗到臨瞓,再煲滾一次,蓋實到第二日,咁就有煲靚粥食,唔駛黏底之餘,又慳柴火,所以就隔晚煲定呢款粥再加多芽菜肉絲炒麵做晏晝,好過出街食或叫外買好多.

玫瑰花香磚

今日除咗整包整餅外,仲做咗呢款玫瑰花香磚,將佢放係衣櫃,櫃桶,打開就有陣陣香味飄出嚟,今次加咗麝香,白玫瑰,白合3種香精,仲加啲色粉,咁就個樣似玫瑰花靚啲,香味都唔錯,幾好聞,當香味消失後,可以將香磚溶解,再加其他喜歡香精,循環再用,都好環保架.

提子車輪包,芝麻方包&杏仁曲奇

天氣轉涼無咁熱,開始有啲心機整野食,今朝攞咗個"哎呀"車輪包模,焗咗個提子車輪包,剩低麵團就做埋山形芝麻方包.

今次表皮燶咗啲,因為剛剛有朋友來電,結果遲咗出爐.

幸好裡面都好鬆軟,今次用咗17小時低溫發酵,所以麵包組織發得比較理想.

開焗爐焗麵包,於是將之前剩餘脆皮奶黃月餅皮,切成一塊塊,加上原粒杏仁,焗成杏仁曲奇餅,好味又鬆脆,不過唔可以成日食,否則膽固醇實超標.

金縷梅防敏感面霜+椰子油潤膚霜

老友要求我做面霜俾佢,梗係應承無甩拖喇,因為佢皮膚比較容易敏感,所以今次材料主要有金縷梅花水,尿囊素,Vita B5,蘆薈萃取,甘油,玫瑰果油,荷荷巴油等成份.



見到天氣開始轉涼/乾燥,咁就順便做多一樣椰子油潤膚霜,用嚟搽吓手腳,好簡單淨係用咗EV冷壓椰子油,甘油,純水,做好後聞到有淡淡椰子香味,好舒服.

荷葉糯米雞

見到朋友post咗佢嘅製成品係FB,覺得幾有新意,於是自己又試吓整, 首先將2/3糯米+1/3粘米浸軟身,將切碎櫻花蝦爆香,加入冬菇粒,蔥粒,蒜蓉,紅蔥頭,最後加入糯米兜勻,再蒸熟.

將雞身裡外用鹽,玫瑰露,老抽搽勻醃4-5個鐘,再塞入蒸熟糯米飯,外面包上已浸軟身荷葉,蒸約45分鐘度.

蒸好打開荷葉.

切開攞出糯米飯再將雞斬件,就可以開飯嚕...,糯米飯好好味,而雞又剛剛熟,好嫩滑,正!

8號風球下芝麻卷

今次打風吹東南風,正正係房間窗口位置,成晚都好嘈,差唔多無乜瞓過咁,但又唔想日頭再瞓,驚今晚瞓唔著覺,麵包又食晒,所以決定整麵包,我成日貪方便整方包,今日就試吓用麵包機攪麵團加埋用剩老麵,再自己造型,捲好再焗,就變成呢款芝麻卷嘞.

麵包組織都OK,總好過全部用麵包機整,不過我另外有部專門攪麵團用攪拌機,所以應該唔駛用麵包機攪,今次都係試驗性質玩吓.